Qashqadaryo viloyatini 1992—1995-yillarda boshqargan Temir Xidirov vafot etdi. Bu haqda bloger Husan Komiljonovning Telegram kanalida ma’lum qilingan.
Aytilishicha, Temir Po‘latovich Xidirov bugun, 14-iyul kuni 77 yoshida vafot etgan.
Temir Xidirov viloyatga 1992-yil 27-yanvardan 1995-yil 29-noyabrga qadar 3 yil 10 oy 2 kun rahbarlik qilgan.
AOKAning viloyat boshqarmasi boshlig‘i Usmon Nusurovning ma’lumot berishicha, Temir Xidirov 1945-yil 14-oktabr kuni Qarshi tumanidagi Gungon qishlog‘ida oddiy dehqon oilasida tug‘ilgan. U Qarshi shahridagi 43-maktabda tahsil olgach, Toshkent irrigatsiya va qishloq xo‘jaligini mexanizatsiyalash muhandislari institutini imtiyozli diplom bilan tamomlagan.
U viloyat suv xo‘jaligi boshqarmasi, “Eski anhor kanal qurilish” trestining Qashqadaryo, Yakkabog‘ mexanizatsiyalashgan ko‘chma kolonnasida oddiy muhandislikdan rahbarlikkacha bo‘lgan yo‘lni bosib o‘tgan. Qumdaryo, Eski anhor kanali qurilishlari va Qarshi dashtini suv bilan ta’minlashda faol ishtirok etgan.Temir Xidirov viloyat partiya qo‘mitasida suv xo‘jaligi sektori mudiri, Qarshi tuman ijroiya qo‘mitasi raisi va O‘zbekiston kompartiyasi Markaziy qo‘mitasida suv xo‘jaligi sektori rahbari bo‘lib faoliyat ko‘rsatgan.
“Shuningdek, u Qarshi tuman partiya qo‘mitasining birinchi kotibi, viloyat partiya qo‘mitasining kotibi, viloyat ijroiya qo‘mitasining raisi, viloyat partiya qo‘mitasining birinchi kotibi, viloyat Kengashining raisi, Mustaqillikning ilk kunlaridanoq viloyatning birinchi hokimi sifatida el-yurt oldida hurmat e’tibor qozongan. Dilkash, kamtarin, samimiy inson, o‘z kasbining chuqur bilimdoni Temir Xidirov bir necha bor Qarshi tuman, viloyat kengashi va Oliy Majlisga deputat etib saylangan. Hukumatimizning ko‘plab orden va medallariga sazovor bo‘lgan”, — deydi AOKAning viloyat boshqarmasi boshlig‘i Usmon Nusurov.
Izoh (0)