Қашқадарё вилоятини 1992—1995 йилларда бошқарган Темир Хидиров вафот этди. Бу ҳақда блогер Ҳусан Комилжоновнинг Telegram каналида маълум қилинган.
Айтилишича, Темир Пўлатович Хидиров бугун, 14 июль куни 77 ёшида вафот этган.
Темир Хидиров вилоятга 1992 йил 27 январдан 1995 йил 29 ноябрга қадар 3 йил 10 ой 2 кун раҳбарлик қилган.
АОКАнинг вилоят бошқармаси бошлиғи Усмон Нусуровнинг маълумот беришича, Темир Хидиров 1945 йил 14 октябрь куни Қарши туманидаги Гунгон қишлоғида оддий деҳқон оиласида туғилган. У Қарши шаҳридаги 43-мактабда таҳсил олгач, Тошкент ирригация ва қишлоқ хўжалигини механизациялаш муҳандислари институтини имтиёзли диплом билан тамомлаган.У вилоят сув хўжалиги бошқармаси, “Эски анҳор канал қурилиш” трестининг Қашқадарё, Яккабоғ механизациялашган кўчма колоннасида оддий муҳандисликдан раҳбарликкача бўлган йўлни босиб ўтган. Қумдарё, Эски анҳор канали қурилишлари ва Қарши даштини сув билан таъминлашда фаол иштирок этган.
Темир Хидиров вилоят партия қўмитасида сув хўжалиги секторининг мудири, Қарши туман ижроия қўмитаси раиси ва Ўзбекистон компартияси Марказий қўмитасида сув хўжалиги сектори раҳбари бўлиб фаолият кўрсатган.
“Шунингдек, у Қарши туман партия қўмитасининг биринчи котиби, вилоят партия қўмитасининг котиби, вилоят ижроия қўмитасининг раиси, вилоят партия қўмитасининг биринчи котиби, вилоят Кенгашининг раиси, Мустақилликнинг илк кунлариданоқ вилоятнинг биринчи ҳокими сифатида эл-юрт олдида ҳурмат эътибор қозонган. Дилкаш, камтарин, самимий инсон, ўз касбининг чуқур билимдони Темир Хидиров бир неча бор Қарши туман, вилоят кенгаши ва Олий Мажлисга депутат этиб сайланган. Ҳукуматимизнинг кўплаб орден ва медалларига сазовор бўлган”, — дейди АОКАнинг вилоят бошқармаси бошлиғи Усмон Нусуров.
Мавзуга доир: Қашқадарё вилоятининг барча ҳокимлари — битта суратда
Изоҳ (0)