Farg‘ona viloyatida 2022-yilning o‘tgan olti oyi mobaynida 14 kishi suvga cho‘kib, vafot etgan. Bu haqda viloyat Favqulodda vaziyatlar boshqarmasida jurnalistlar va blogerlar ishtirokida o‘tkazilgan matbuot anjumanida ma’lum qilindi, deya xabar beradi “Daryo” muxbiri.

Aytilishicha, 2021-yilda suvga cho‘kish bilan bog‘liq to‘qqizta baxtsiz hodisa sodir bo‘lgan bo‘lib, oqibatda yetti kishi vafot etgan.

“Joriy yilning o‘tgan olti oyi davomida suvga cho‘kish bilan bog‘liq 12 ta holat qayd etilgan, 14 kishi baxtsiz hodisa qurboniga aylangan. Ushbu holatlarning sakkiztasi voyaga yetmaganlar bilan bog‘liq”, — deydi boshqarma mas’uli.

Qo‘shimcha qilinishicha, Favqulodda vaziyatlar boshqarmasi xodimlari tomonidan bu kabi baxtsiz hodisalarning oldini olish maqsadida viloyatdagi daryo, kanal va soylar qirg‘oqlariga 1 ming 250 dan ortiq cho‘milish ta’qiqlanganini anglatuvchi belgilar, 850 ta targ‘ibot pannosi, 65 ta yirik hajmli banner o‘rnatilgan.

Cho‘milish taqiqlangan hududlarda 1 ming 200 dan ortiq profilaktik tadbirlar o‘tkazilgan.