Oziq-ovqat tanqisligi: o‘g‘it narxlarining balandligi sabab Osiyoda guruch hosili xavf ostida

Oziq-ovqat tanqisligi va inflyatsiya o‘sib borayotgan bir vaqtda o‘git narxining oshishi Osiyo davlatlaridagi guruch hosilini xavf ostiga qo‘ymoqda. Bu haqda Bloomberg xabar berdi.

Kasikornbank ma’lumotlariga ko‘ra, dunyoning ikkinchi yirik guruch eksportchisi bo‘lgan Tailandda o‘g‘it narxining ko‘tarilishi tufayli hosildorlik pasayishi mumkin.

Hosilning kamligi esa xorijdan xaridlarga bo‘lgan ehtiyojni oshiradi. Xitoy zararkunandalarning hosilga salbiy ta’siridan xavotirda, Hindistonda esa u yaxshi mussonga bog‘liq.

Musson — yomg‘irlar mavsumi. U shamol yilning iliq paytlari dengizdan quruqlikka, sovuq paytlari esa quruqlikdan dengizga qarab esadigan iqlim zonalariga nisbatan ishlatiladi.

Osiyoda guruchning katta qismi yetishtiriladi va iste’mol qilinadi. Shu tufayli u mintaqadagi siyosiy va iqtisodiy barqarorlik uchun muhim.

Ukrainadagi urushdan so‘ng bug‘doy va makkajo‘xori narxining ko‘tarilishidan farqli o‘laroq, guruch narxi nazorat qilindi, ammo u shundayligicha qolishiga kafolat yo‘q.

Bug‘doy va makkajo‘xori narxining oshishi muqarrar ravishda oziq-ovqat va chorva uchun ozuqa — guruchga bo‘lgan talabni kuchaytiradi.

Dunyo bo‘ylab eksport qilinadigan asosiy mahsulotlarning 40 foizini yetkazib beradigan Hindistonda iqtisodiyot guruch ekinlari bilan bog‘liq.

Global ta’minot xavf ostida, ammo hozircha bizda narxlarni pasaytirayotgan Hindiston mavjud, — dedi The Race Trader vitse-prezidenti, tadqiqotchi va konferensiya tashkilotchisi Subramanian.

Hindiston bug‘doy eksportini allaqachon cheklab qo‘ygan. Guruch ro‘yxatda keyingi bo‘lishi mumkin degan xavotir bor, ammo bu musson yomg‘irlari va hosil miqdoriga bog‘liq. Hozircha musson odatdagidek davom etmoqda.

Hozircha Hindistonning guruch eksporti mintaqadagi har qanday ta’minot tanqisligini yumshatishga yordam beradi.

Tailanddagi Kasikorn tadqiqot markaziga ko‘ra, Ukrainadagi urushdan so‘ng fermerlar o‘g‘itdan tobora kamroq foydalanmoqda, chunki ularning narxi rekord darajada oshib ketgan. Bu esa hosildorlikni pasaytiradi.

Avvalroq bug‘doy narxi ortidan Osiyo guruchining ham narxi ko‘tarilayotgani haqida xabar berilgandi.