Озиқ-овқат танқислиги ва инфляция ўсиб бораётган бир вақтда ўгит нархининг ошиши Осиё давлатларидаги гуруч ҳосилини хавф остига қўймоқда. Бу ҳақда Bloomberg хабар берди.
Kasikornbank маълумотларига кўра, дунёнинг иккинчи йирик гуруч экспортчиси бўлган Таиландда ўғит нархининг кўтарилиши туфайли ҳосилдорлик пасайиши мумкин.
Ҳосилнинг камлиги эса хориждан харидларга бўлган эҳтиёжни оширади. Хитой зараркунандаларнинг ҳосилга салбий таъсиридан хавотирда, Ҳиндистонда эса у яхши муссонга боғлиқ.
Муссон — ёмғирлар мавсуми. У шамол йилнинг илиқ пайтлари денгиздан қуруқликка, совуқ пайтлари эса қуруқликдан денгизга қараб эсадиган иқлим зоналарига нисбатан ишлатилади.
Осиёда гуручнинг катта қисми етиштирилади ва истеъмол қилинади. Шу туфайли у минтақадаги сиёсий ва иқтисодий барқарорлик учун муҳим.
Украинадаги урушдан сўнг буғдой ва маккажўхори нархининг кўтарилишидан фарқли ўлароқ, гуруч нархи назорат қилинди, аммо у шундайлигича қолишига кафолат йўқ.
Буғдой ва маккажўхори нархининг ошиши муқаррар равишда озиқ-овқат ва чорва учун озуқа — гуручга бўлган талабни кучайтиради.
Дунё бўйлаб экспорт қилинадиган асосий маҳсулотларнинг 40 фоизини етказиб берадиган Ҳиндистонда иқтисодиёт гуруч экинлари билан боғлиқ.
Глобал таъминот хавф остида, аммо ҳозирча бизда нархларни пасайтираётган Ҳиндистон мавжуд, — деди The Race Tradeр вице-президенти, тадқиқотчи ва конференция ташкилотчиси Субраманиан.
Ҳиндистон буғдой экспортини аллақачон чеклаб қўйган. Гуруч рўйхатда кейинги бўлиши мумкин деган хавотир бор, аммо бу муссон ёмғирлари ва ҳосил миқдорига боғлиқ. Ҳозирча муссон одатдагидек давом этмоқда.
Ҳозирча Ҳиндистоннинг гуруч экспорти минтақадаги ҳар қандай таъминот танқислигини юмшатишга ёрдам беради.
Таиланддаги Касикорн тадқиқот марказига кўра, Украинадаги урушдан сўнг фермерлар ўғитдан тобора камроқ фойдаланмоқда, чунки уларнинг нархи рекорд даражада ошиб кетган. Бу эса ҳосилдорликни пасайтиради.
Аввалроқ буғдой нархи ортидан Осиё гуручининг ҳам нархи кўтарилаётгани ҳақида хабар берилганди.
Изоҳ (0)