Birlashgan Millatlar Tashkiloti Taraqqiyot dasturi hisobotiga ko‘ra, Ukrainadagi urush tufayli yuzaga kelgan oziq-ovqat va energiya narxlarining ko‘tarilishi natijasida dunyo bo‘ylab yana 71 million kishi qashshoqlikni boshdan kechirmoqda.
Inflyatsiyadan eng ko‘p jabr ko‘rgan 20 davlat orasida O‘zbekiston ham bor. Bundan tashqari, Gaiti, Argentina, Misr, Iroq, Turkiya, Filippin, Ruanda, Sudan, Gana, Keniya va Shri-Lanka ham ushbu ro‘yxatga kiritilgan.
Urushdan keyingi dastlabki uch oy ichida 51,6 million ko‘proq odam qashshoqlikka tushib, kuniga 1,90 dollar yoki undan kam daromad bilan kun kechirgan.
Yana 20 million kishi kuniga 3,20 dollar daromadga kun kechirayotgani qayd etildi.
Rivojlanayotgan mamlakatlarda oilalar o‘z daromadlarining 42 foizini oziq-ovqatga sarflaydi, ammo G‘arb davlatlari Rossiyaga sanksiyalar kiritgach, yoqilg‘i, bug‘doy, shakar va yog‘ kabi asosiy oziq-ovqat mahsulotlari narxi ko‘tarildi.
Ukrainaning to‘sib qo‘yilgan portlari va past daromadli mamlakatlarga don eksport qila olmasligi narxlarni yanada oshirib, o‘n millionlab odamlarni qashshoqlikka olib keldi.
Ma’lumotlarga ko‘ra, qashshoq yoki qashshoqlikka moyil bo‘lgan odamlarning umumiy soni 5 milliarddan ortiq yoki dunyo aholisining 70 foizdan sal kamrog‘ini tashkil qiladi.
Inqirozning eng keskin ta’siriga Markaziy Osiyoda Armaniston va O‘zbekiston, Afrikada Burkina-Faso, Gana, Keniya, Ruanda va Sudan, Lotin Amerikasida Gaiti, Janubiy Osiyoda Pokiston va Shri-Lanka kiradi.
Birlashgan Millatlar Tashkiloti Taraqqiyot dasturi energiya subsidiyalariga milliardlab mablag‘ sarflash o‘rniga hukumatlarga xarajatlarni maqsadli pul o‘tkazmalari orqali eng ko‘p zarar ko‘rgan odamlarga yetkazishni tavsiya qiladi.
Bu esa yana 52,6 million kishining kuniga 5,50 dollar daromadga kun kechirish darajasiga tushib qolishining oldini oladi.
Izoh (0)