Gruziyadagi muxolifatchi partiyalar, nohukumat tashkilotlar vakillari va ularning tarafdorlari Tbilisi markazida hukumat iste’fosini talab qilib miting o‘tkazdi, ularning bir qismi hukumat binosi oldida tunab qolgan. Bu haqda “Sputnik Gruziya” xabar berdi.
Hukumat iste’fosini talab qiluvchi aksiya 3-iyul kuni kechqurun parlament binosi oldida boshlangan. Miting ishtirokchilarining fikricha, yangi hukumatgina Yevropa Ittifoqi a’zoligiga nomzod maqomiga ega bo‘lish uchun tegishli islohotlarni amalga oshira oladi, “Gruziya orzusi” hukmron jamoasi esa bunga qodir emas.
Shuningdek, bir necha yuz kishi Tbilisidagi parlament binosidan hukmron “Gruziya orzusi” partiyasi ofisiga tomon harakatlangan.
“Shu yerda tunab, ertalab bosh vazirga u tushunmayotgan narsani tinch aksiya va tinch norozilik bildirish orqali aytamiz”, — degan aksiya ishtirokchilaridan biri.
Yevropa Ittifoqiga kiruvchi davlat va hukumat rahbarlari Bryusseldagi sammitda Ukraina va Moldovaga ittifoqqa a’zo bo‘lish uchun nomzodlar maqomi berilishini ma’qullagan edi. Yevropa kengashi prezidenti Sharl Mishelning so‘zlariga ko‘ra, YI kengashi Gruziyaning Yevropa istiqbolini tan olishga qaror qilgan va belgilangan maqsadlar amalga oshishi bilan unga maqom berishga tayyor. Hukmron “Gruziya orzusi” partiyasi YI a’zoligiga nomzod maqomini olishda zarur 12 ta shartni bajarish uchun ishchi guruhlar tuzishni rejalashtirayotganini e’lon qilgan.
Izoh (0)