Finlyandiyaning Rossiya bilan chegara yaqinidagi shaharlariga NATO bazalarining joylashtirilishi u yerdagi aholini zarba ostiga qo‘yadi, deya ma’lum qildi Rossiya Davlat dumasi raisi Vyacheslav Volodin.
Shu tariqa u Finlyandiyaning Lappeyenranta shahri meri Kimmo Yarvaning mahalliy aeroportdan NATO bazalarini joylashtirishda foydalanish haqidagi taklifiga izoh berdi. Yarva o‘shanda Finlyandiyaning NATOga a’zolik istiqboli Janubiy Kareliyaga umid va xavfsizlik hissini berishini aytgandi.
Bunday fikrni Volodin xato deb hisoblab, jangovar harakatlar boshlangan taqdirda, zarbalar birinchi navbatda dushmanning harbiy obyektlariga berilishini eslatdi.
“NATO bazalarining joylashtirilishi Finlyandiyani ham, Shvetsiyani ham himoya qilmaydi. Aksincha. Harbiy infratuzilma joylashgan shaharlar aholisini zarba ostiga qo‘yadi”, — deb yozdi u Telegram’da.
Finlyandiya va Shvetsiya Rossiyaning Ukrainadagi bosqini boshlanganidan keyin NATOga kirish istagini bildirdi va may oyida ariza topshirdi. Ularni qabul qilish uchun NATOga a’zo barcha 30 davlatning qo‘llab-quvvatlovi zarur, biroq Turkiya bunga qarshi chiqdi: u ikki davlatni o‘z hududida Anqara tomonidan tan olingan terrorchi Kurdiston Ishchilar partiyasi a’zolarini yashirganlikda aybladi.
28—30-iyun kunlari Madridda bo‘lib o‘tgan NATO sammiti arafasida uch davlat murosaga erishdi va Turkiya veto huquqidan voz kechdi, Stokgolm va Xelsinki rasman NATOga taklif qilingan davlatlar maqomini oldi. Endi ularning alyansga kirishi ishtirokchi mamlakatlar parlamentlari tomonidan tasdiqlanishi kerak.
NATO bosh kotibi Yens Stoltenberg Finlyandiyaning tashkilotga bo‘lg‘usi a’zoligi Rossiya prezidenti Vladimir Putinga alyans eshiklari ochiq qolishi va u buning aksiga erishishga uringaniga qaramay, Rossiya chegaralari yaqinida endi ko‘proq NATOni ko‘rishi haqida signal bo‘lib xizmat qilishini qayd etdi.
Rossiya prezidenti Vladimir Putin Shvetsiya va Finlyandiyaning NATOga kirishi Moskva xavotiriga sabab bo‘lmasligini aytgan. Ammo u bundan Rossiyaga tahdidlar paydo bo‘lgan taqdirda mamlakat zudlik bilan javob qaytarishni aytgan.
Izoh (0)