Грузиядаги мухолифатчи партиялар, ноҳукумат ташкилотлар вакиллари ва уларнинг тарафдорлари Тбилиси марказида ҳукумат истеъфосини талаб қилиб митинг ўтказди, уларнинг бир қисми ҳукумат биноси олдида тунаб қолган. Бу ҳақда «Спутник Грузия» хабар берди.
Ҳукумат истеъфосини талаб қилувчи акция 3 июль куни кечқурун парламент биноси олдида бошланган. Митинг иштирокчиларининг фикрича, янги ҳукуматгина Европа Иттифоқи аъзолигига номзод мақомига эга бўлиш учун тегишли ислоҳотларни амалга ошира олади, «Грузия орзуси» ҳукмрон жамоаси эса бунга қодир эмас.
Шунингдек, бир неча юз киши Тбилисидаги парламент биносидан ҳукмрон «Грузия орзуси» партияси офисига томон ҳаракатланган.
«Шу ерда тунаб, эрталаб бош вазирга у тушунмаётган нарсани тинч акция ва тинч норозилик билдириш орқали айтамиз», — деган акция иштирокчиларидан бири.
Европа Иттифоқига кирувчи давлат ва ҳукумат раҳбарлари Брюсселдаги саммитда Украина ва Молдовага иттифоққа аъзо бўлиш учун номзодлар мақоми берилишини маъқуллаган эди. Европа кенгаши президенти Шарл Мишелнинг сўзларига кўра, ЕИ кенгаши Грузиянинг Европа истиқболини тан олишга қарор қилган ва белгиланган мақсадлар амалга ошиши билан унга мақом беришга тайёр. Ҳукмрон «Грузия орзуси» партияси ЕИ аъзолигига номзод мақомини олишда зарур 12 та шартни бажариш учун ишчи гуруҳлар тузишни режалаштираётганини эълон қилган.
Изоҳ (0)