Pokistonga Sirdaryo qovunlari yetkazib beriladi

O‘zbekistonlik haydovchilar Afg‘oniston hududi orqali Pokistonga tranzit yuk tashuvini boshlaydi. 

Yil oxiriga qadar Afg‘oniston orqali 2,5 ming tonna sarxil va quritilgan meva-sabzavotlar jo‘natish rejalashtirilgan, deb yozmoqda CentralAsia O‘zbekiston Transport vazirligi xabariga tayanib.

Avtotransport orqali yetkaziladigan birinchi yuk Sirdaryo viloyati qovunlari bo‘ladi. Tez orada 40 tonnalik partiya ushbu yo‘nalish bo‘ylab yuk tashish bilan shug‘ullanuvchi Chemical Business transport kompaniyasining yuk mashinalarida jo‘natiladi.

Korxona rahbari Faxriddin Nabiyevning aytishicha, yil oxiriga qadar O‘zbekistondan 2,5 ming tonna ho‘l va quritilgan meva Pokiston bozorlariga kirib boradi.  

Yangi yo‘nalish mahalliy tovarlarni dengiz portlariga yetkazish uchun eng qisqa yo‘lni ta’minlaydi, deya qo‘shimcha qildi tadbirkor.

Uning so‘zlariga ko‘ra, janubga transport uchun ko‘proq haq to‘lanadi. Agar yuk mashinasi haydovchisi Moskvaga reys uchun o‘rtacha 700-800 dollar oladigan bo‘lsa, Karachi uchun 3500-4000 dollar so‘raladi.

Bundan tashqari, Chemical Business vakillari Pokistondagi yo‘l infratuzilmasining yaxshi holati va xizmatlar sifatini qayd etishdi. 

Yuk tashuvchilar uchun elektron vizalarni rasmiylashtirishda hech qanday muammo yuzaga kelmadi.

2021-yilning noyabr oyida O‘zbekistondan birinchi tranzit yuk Pokistonga yetib borgan edi. Keyinroq Pokiston tomoni Gvadar, Karachi va Qosim portlari orqali tranzitni kengaytirish maqsadida o‘zbekistonlik yuk tashuvchilarning kirishini soddalashtirdi.

Mart oyidan boshlab, Pokiston O‘zbekistonga go‘sht yetkazib berishni yo‘lga qo‘ygan. Biroz vaqt o‘tgach, Hindiston ilk bor Pokiston va Afg‘oniston hududi orqali O‘zbekistonga shakar va boshqa tovarlar tranzit yukini jo‘natdi.

Bundan tashqari, uch mamlakat Trans-Afg‘on temiryo‘li loyihasi bo‘yicha bir necha yildan buyon hamkorlikda ishlamoqda. 

Afg‘onistonda hokimiyat almashgach, to‘xtatilgan loyiha 2022-yil boshida kun tartibiga qaytib, mart oyidan boshlab dastlabki ishlarni boshlashga tayyorgarlik ko‘rilmoqda.

Avvalroq O‘zbekiston supermarketlarida rambutan, pitaxayya va kumvkat singari ekzotik mevalar sotuvga chiqgan edi.