O‘zbekistonda ekzotik bamiya sotuvga chiqdi — Qishloq xo‘jaligi vazirligi

Qishloq xo‘jaligi vazirligi O‘zbekistonda ekzotik bamiya yetishtirilayotgani va sotuvga chiqqani haqida ma’lum qildi.

Qayd etilishicha, noan’anaviy sabzavot ekinlari seleksiyasi va urug‘chilikni rivojlantirish muhim masala hisoblanadi.

Yangi navlarni yaratish va yetishtirish texnologiyalarini ishlab chiqish mamlakatimizda sog‘lom ovqatlanishning asosi bo‘lgan sabzavot ekinlari turlarini yanada kengaytirish imkonini beradi.

Bamiya mevalari achchiq qalampirga o‘xshab ketadi va qutisimon piramida shakliga ega. 

Bamiyaning ta’mi — baqlajon yoki sparja loviyasi va qovoqchanikiga yaqin. Yetishtirishda joy tanlamaydi, qurg‘oqchilikka chidamli.

Bamiya mevalari peshob chiqarish tizimi kasalliklari va surunkali diareyada foydali, – deydi mutaxassis Bahodir Ibrohimov.

Sabzavot tabiiy sharoitda Hindiston, Afrika, Shimoliy Amerikaning janubiy tumanlarida o‘sadi. 

Butun dunyoda 120 ming gektardan ortiq maydonda ekiladi. BMT Oziq-ovqat va qishloq xo‘jaligi tashkiloti (FAO) ma’lumotlariga ko‘ra, 2021-yili jahon miqyosida 10,1 mln tonna bamiya hosili olingan.

O‘zbekistonda bamiya 2018-yildan buyon yetishtirib kelinmoqda. Samarqand, Andijon, Toshkent viloyatlarida 200 gektar maydon ushbu ekin uchun ajratilgan. Bir gektardan 13-14 tonnagacha hosil olinadi.

Bugungi kunda O‘zbekistonning yirik savdo rastalarida ushbu sabzavot sotuvga chiqqan.

Avvalroq O‘zbekiston supermarketlarida rambutan, pitaxayya va kumvkat singari ekzotik mevalar sotuvga chiqqandi.