AQSHda inflyatsiya o‘sayotgani sari retsessiya xavfi oshmoqda — WSJ

AQSHda foiz stavkalarining yuqorilashi kelgusi 12 oy ichida retsessiya ehtimolini 44 foizga oshirmoqda. Bu haqda The Wall Street Journal xabar berdi.

Inflyatsiya bosimining kuchliligi va Federal rezerv shu tufayli stavkalarni tobora oshirayotganligi sababli bu yil retsessiya ehtimoli tez oshdi.

Retsessiya ehtimoli bir qator omillar tufayli oshdi: qarz olish xarajatlarining oshishi, inflyatsiyaning keskin sur’atlari, ta’minot zanjiri muammolari va Ukrainadagi urushdan kelib chiqqan tovar narxi zarbalari.

Bunday vaziyatda retsessiyadan qochish qiyin, — deb hisoblaydi Daiwa Capital Markets America bosh iqtisodchisi Maykl Moran.

So‘rovnomada qatnashgan iqtisodchilar inflyatsiya prognozlarida sezilarli o‘sishni ko‘rmoqda, ular aprel oyidagi so‘rovda 5,5 foizlik inflyatsiyadan yilni 7 foizda yakunlanishini taxmin qildi.

Iqtisodchilarning ta’kidlashicha, federal jamg‘armalar stavkasi joriy yil oxirida taxminan 3,3 foizni tashkil etadi. Bu 2022-yilda 0,5 foiz punktiga kamida yana uchta o‘sishni nazarda tutadi.

Fed 40 yillik eng yuqori inflyatsiyaga qarshi kurashish uchun bu yil stavkalarni so‘nggi o‘n yillikdagi eng tez sur’atda oshirishni davom ettirishini bildirgan.

Iste’molchilar yozda dam olish va sayohatga bemalol pul sarflashda davom etsa-da, doimiy ravishda oshib borayotgan inflyatsiya, foiz stavkalarining ko‘tarilishi va qimmatli qog‘ozlar narxining pasayishi sarf-xarajatlarni pasaytiradi, biznes investitsiyalari va ishga yollashni cheklaydi, — dedi EY-Parthenon konsalting kompaniyasining bosh iqtisodchisi Greg Dako.

Iqtisodchilar Fed stavkalarini oshirishi sababli ishsizlik ko‘payishini kutmoqda.Ular ishsizlikni may oyidagi 3,6 foizdan 2022-yil oxirida o‘rtacha 3,7 foizga o‘sishini prognoz qilmoqda.

So‘nggi ma’lumotlar shuni ko‘rsatadiki, AQSH iqtisodiyoti o‘sib borayotgan inflyatsiya va foiz stavkalarining ko‘tarilishi, shu jumladan 2008-yildan beri eng yuqori bo‘lgan ipoteka stavkalarining umumiy o‘sishi ostida sekinlasha boshlagan.

Iqtisodchilar so‘nggi kunlarda ikkinchi chorakda ishlab chiqarish o‘sishi bo‘yicha prognozlarini pasaytirdi. Atlanta Federal rezerv bankining GDPNow kuzatuvchisi yalpi ichki mahsulot 30-iyungacha uch oy davomida yillik stavkada o‘zgarishsiz qolishini taxmin qilmoqda.

Avvalroq AQSH asosiy stavkani keskin ko‘targani, bu jahon iqtisodiyotiga qanday ta’sir qilishi haqida xabar berilgan edi.