“Bu sinovni og‘ir-bosiqlik, ahillik bilan ortda qoldirish kerak”. Shavkat Mirziyoyev Qoraqalpog‘istondagi vaziyat haqida

Qoraqalpog‘istonda sodir bo‘lgan vaziyatni og‘ir-bosiqlik, ahillik bilan ortda qoldirish kerak. Bu haqda Shavkat Mirziyoyev 3-iyul kuni Nukus tumanidagi “Samanbay” ovul fuqarolar yig‘inida aholi bilan bo‘lgan uchrashuvda aytdi.

3-iyul kuni Nukus shahrida Shavkat Mirziyoyev ishtirokida yig‘ilish bo‘lib o‘tgandi. Yig‘ilishdan so‘ng, prezident Nukus tumanidagi “Samanbay” ovul fuqarolar yig‘iniga borib, yoshullilar, hokim yordamchilari, yoshlar yetakchilari va xotin-qizlar faollari bilan uchrashdi.

Davlat rahbari matbuot xizmatining xabar berishicha, Shavkat Mirziyoyev Qoraqalpog‘istonda sodir bo‘lgan tashvishli voqealarni butun xalq chuqur dard va iztirob bilan qabul qilgani, bu sinovni og‘ir-bosiqlik, ahillik bilan ortda qoldirish kerakligini ta’kidladi.

Odamlar buni tasdiqlab, Qoraqalpog‘istonning donishmand eli bundan buyon ham o‘zbek va qoraqalpoq xalqlarining birligiga, og‘izbirchiligiga asoslangan muqaddas qadriyatlarni ko‘z qorachig‘idek asrab-avaylab yashashiga ishonch bildirdi.