Nukus aeroporti faoliyatiga cheklov o‘rnatildi

Nukus aeroporti faoliyati komendantlik soatlarida vaqtinchalik cheklanadi. Bu haqda Uzbekistan Airports matbuot xizmati xabar berdi.

Ma’lum qilinishicha, Qoraqalpog‘istonda favqulodda holat joriy etilishi va prezident qarori ijrosini ta’minlash maqsadida ushbu aeroport faoliyati komendantlik soatlarida (21:00 dan 07:00 gacha) cheklanadi.

Shu munosabat bilan Uzbekistan Airways’ning 3-iyul kuni Toshkent—Nukus—Toshkent yo‘nalishi bo‘yicha HY017/HY018 reyslari bekor qilindi. Bekor qilingan reyslarning barcha yo‘lovchilari 4-iyul kuni Toshkent—Nukus—Toshkent yo‘nalishi bo‘yicha HY011/HY012 reyslari orqali yetkaziladi.

Aviakompaniya yo‘lovchilarni reyslar kechiktirilishi haqida xabardor qilgan.

Eslatib o‘tamiz, Nukusdagi ommaviy namoyishlardan so‘ng fuqarolarning xavfsizligini ta’minlash, ularning huquq va erkinliklarini himoya qilish, qonuniylik va huquq-tartibotni tiklash maqsadida Qoraqalpog‘iston hududida 3-iyul kuni soat 00:01 dan 2-avgust kuni soat 00:00 ga qadar bo‘lgan davrda favqulodda holat joriy etildi.

Favqulodda holat davrida soat 21:00 dan 7:00 gacha komendantlik soati joriy qilindi. Milliy gvardiya qo‘mondoni Rustam Jo‘rayev Qoraqalpog‘iston Respublikasi komendanti etib tayinlandi.