FIFA o‘zining rasmiy saytida 2022-yilgi Jahon Chempionatida o‘yindan tashqari holatlarni aniqlash uchun yarim avtomatik VAR tizimidan foydalanishini ma’lum qildi.
Yarim avtomatik VAR hakamlarga o‘yindan tashqari holatlarni tezkor aniqlashga yordam beradi. Tizim avtomatik ravishda to‘pning joylashishini aniqlaydi va o‘yinchilar pozitsiyasining uch o‘lchovli modellarini yaratadi.
“Yangi texnologiyada to‘pni kuzatish uchun stadion tomi ostiga o‘rnatilgan 12 ta maxsus kameradan foydalaniladi. Shuningdek, u har bir futbolchi tanasining 29 nuqtasini hisobga oladi va ularning maydondagi aniq holatini soniyasiga 50 marta kuzatib boradi. Ushbu 29 nuqtaga o‘yindan tashqari holatlarni aniqlash uchun tegishli bo‘lgan tananing va qismlarini va qo‘l-oyoqlari kiradi”, — deb yozadi FIFA matbuot xizmati.
FIFA prezidenti Janni Infantino bu tizim klublar o‘rtasidagi Jahon Chempionatida sinovdan o‘tgani va u ijobiy natija berganini aytgandi. Infantino FIFAdagi barcha ushbu yangi texnologiyadan qoniqish hosil qilganini ta’kidlagan.
Avvalroq FIFA JCH—2022 ishtirokchilari qaydnomaga 26 nafar, kengaytirilgan tarkibga esa 55 nafar futbolchini kiritishiga ruxsat bergani xabar qilingandi.
Eslatib o‘tamiz, Jahon Chempionati 2022-yilning 21-noyabridan 18-dekabriga qadar bo‘lib o‘tadi. Musobaqaning amaldagi g‘olibi Fransiya terma jamoasidir.
Izoh (0)