Finlyandiya Turkiya sabab qonunlarini o‘zgartirmoqchi emasligini ma’lum qildi

Finlyandiya qonunchilikda o‘zgarishlarga olib bormaydi va Turkiya so‘ragan shaxslarni juda arzirli sabablar bo‘lgan taqdirdagina ekstraditsiya qilishi mumkin, deya bayonot berdi Finlyandiya tashqi ishlar vaziri Pekka Haavisto.

“Agar Turkiya Finlyandiyanig NATOga a’zoligini ratifikatsiya qilish evaziga qonunchiligimizda o‘zgarishlar talab qilsa, Finlyandiya bunday yon berishga borishi dargumon”, — deydi Haavisto 1-iyul kuni Yle nashriga.

Uning so‘zlariga ko‘ra, “Memorandumda (NATOning Madriddagi sammiti doirasida Turkiya, Shvetsiya va Finlyandiya tomonidan qabul qilingan o‘zaro tushunish to‘g‘risida) qonunlarga o‘zgartirish kiritish yoki shunga o‘xshash biror shart haqida gapirilmagan. Biz bunday majburiyatlarni o‘z zimmamizga olmaganmiz”.

“Barcha kelishilgan narsa qog‘ozga tushirildi. Turli nuqtayi nazarlarni ifodalash mumkin, ammo hujjat matnida aytilganidan boshqa masala bo‘yicha kelishuv bo‘lishi mumkin emas”, — deya ta’kidlagan Haavisto.

Shuningdek, u Finlyandiya Turkiyaning terrorchi deb hisoblangan shaxslarni ekstraditsiya qilish talabiga “juda arzirli sabablar mavjud bo‘lgandagina” rozi bo‘lishi mumkinligini aytdi.

“Men Finlyandiya va Shvetsiyadagi kurdlar xavotirga tushayotganini tushunaman. Ammo ekstraditsiya haqida gap ketganda, buning sababi Finlyandiyada ham isbotlangan terrorchilik jinoyati bo‘lishi kerak — deydi Haavisto. “Bundan tashqari, Finlyandiya o‘ziga qiynoqlar yoki o‘lim jazosi kutayotgan odamlarni ekstraditsiya qilmaslik majburiyatini oldi. Ekstraditsiya uchun juda arzirli asoslar bo‘lishi kerak”, — degan Finlyandiya TIV rahbari.

Bir kun oldin Turkiya prezidenti Rajab Toyyib Erdo‘g‘on “Finlyandiya va Shvetsiya terrorizmga oid qonunchiligiga o‘zgartirish kiritishi kerak”, deya Madriddagi sammitda qabul qilingan o‘zaro anglashuv memorandumiga ishora qilgandi.

Bundan tashqari, u Shvetsiya va Finlyandiya terrorizmda ayblangan o‘ttiz uch kurdni Turkiyaga ekstraditsiya qilish zarurligini bir necha bor ta’kidlagan. Ba’zi ommaviy axborot vositalariga ko‘ra, bu son keyinroq taxminan yetmish uch kishini tashkil qilgan.