Pentagon Ukraina uchun innovatsion qurollarni ishlab chiqish bo‘yicha 800 ta kompaniyaning 1,3 mingga yaqin taklifini ko‘rib chiqmoqda. Bu haqda AQSH mudofaa vazirligi vakiliga tayanib, CNN xabar berdi.
Ta’kidlanishicha, Pentagon yaqin haftalarda tanlov qilishga umid bildirmoqda.
Telekanal ma’lumotlariga ko‘ra, Pentagon so‘rovi Ukrainaning harbiy ehtiyojlarida asosiy deb topilgan qurol-yarog‘lar: zenit, tankka qarshi, piyodalarga qarshi va qirg‘oq mudofaasi uchun qurollar, uchuvchisiz aviatizimlar, kontrbatareya tizimlari va xavfsiz aloqa vositalarini nazarda tutadi.
23-iyun kuni Ukraina AQSHdan HIMARS baravar o‘t ochuvchi reaktiv tizimlarini (MLRS) olgandi. Ukraina mudofaa vaziri Oleksiy Reznikov Pentagon rahbari Lloyd Ostinga hamkorlik uchun minnatdorlik bildirdi. “Yoz Rossiya bosqinchilari uchun alangali bo‘ladi. Ulardan ba’zilari uchun esa bu oxirgi yoz”, — dedi Reznikov.
Avval Rossiya Ukrainaga qurol yetkazib berilgani uchun NATO davlatlariga nota yuborgan edi. Rossiya tashqi ishlar vaziri Sergey Lavrov Ukraina uchun qurol bo‘lgan har qanday yuk Rossiya uchun qonuniy nishonga aylanishini qayd etgan. Rossiya Tashqi ishlar vazirligi NATO davlatlari Ukrainaga qurol yetkazib berish orqali “olov bilan o‘ynamoqda”, deb ta’kidlagan.
Rossiya prezidentining matbuot kotibi Dmitriy Peskov Ukrainaga G‘arbdan qurol-yarog‘ yetkazib berish Rossiya—Ukraina muzokaralarining muvaffaqiyatiga hissa qo‘shmasligi va salbiy ta’sir ko‘rsatishini ta’kidlagan.
Izoh (0)