AQSH saylovlarga aralashuv haqidagi ma’lumot uchun 10 mln dollar mukofot e’lon qildi

AQSH Davlat departamenti mahalliy saylovlarga xorij aralashuvi bo‘yicha ma’lumot taqdim etgan odamlarga 10 million dollargacha qiymatda mukofot e’lon qildi, deb yozadi “Kommersant” idora matbuot xizmatiga tayanib.

Mukofotni saylovlarga aralashayotgan chet elliklar yoki xorijiy kompaniyalar joylashgan joyini aniqlash yoki topishda yordam beradigan axborot taqdim etganlar qo‘lga kirita oladi.

Idora qo‘shimcha qilishicha, saylovlarga aralashish deganda “yashirin, firibgarlarcha, chalkashtiruvchi noqonuniy xatti-harakatlar yoki harakatlarga urinish”, shuningdek, “ovoz berish yakunlarini qalbakilashtirish va ma’lumotlar bazasiga buzib kirish; muayyan ta’sir, dezinformatsiya va bot-fermalar yaratish bo‘yicha kampaniyalar; yoki yovuz niyatli kiberhujumlar” tushuniladi.

Mukofot Davlat departamentining “Adolat uchun mukofotlash” dasturi doirasida tayinlangan, uni diplomatik xavfsizlik xizmati boshqaradi. Dastur 1984-yildan buyon ish olib boradi, uning doirasida AQSH 250 million dollardan ortiq qiymatda mukofot pullari to‘lagan.

AQSH Rossiyani bir necha marta saylovlar natijalariga ta’sir o‘tkazish niyatida ayblagan.

Xususan, aprelda Associated Press agentligi AQSH razvedkasi Rossiya Amerikaning Ukrainaga ko‘magidan foydalanib, uning siyosiy ishlariga aralashishi mumkinlgini ma’lum qilganini yozgandi.

Moskva Vashingtonning Rossiya Amerika saylovlariga aralashishga uringani haqidagi barcha bayonotlarini qat’iyan rad etmoqda. Prezident vakili Dmitriy Peskov bunday xabarlarni uydirma va haqiqatga hech qanday aloqasi yo‘q deb atagandi.

Iyunda esa AQSHning ichki xavfsizlik uchun mas’ul bo‘lgan mansabdorlari Rossiya noyabrda bo‘lib o‘tadigan kongressga saylovlarga aralashishi mumkinligidan xavotir bildirdi.