Xitoy Xalq Respublikasi Tashqi ishlar vazirligi rasmiy vakili Chjao Litszyan AQSH iloji boricha tezroq Afg‘onistonga uning milliy aktivlarini qaytarib berishi kerakligini ma’lum qildi, deb yozadi “Interfaks” Xitoyning “Sinxua” agentligiga tayanib.
Chjao Litszyanning so‘zlariga ko‘ra, AQSH ko‘p yillar davomida Afg‘onistonda kuzatilgan urush va nizolar, kambag‘allik, ocharchilik va odamlarning azob-uqubatlari uchun javobgardir.
Uning qayd etishicha, AQSH Afg‘onistonga bostirib kirganidan keyin 20 yil davomida 30 mingdan ortiq tinch aholi o‘ldirilgan, 11 million odam esa qochqinga aylangan. Shu davrda AQSH, shuningdek, Afg‘onistonda narkotiklar ishlab chiqarish va ular bilan savdo qilishga ko‘ra-bila turib yo‘l qo‘yib bergan va o‘zi ham ishtirok etgan. Chjao Litszyanga ko‘ra, ko‘knor yetishtirish va opium ishlab chiqarish hajmi hozir AQSH bostirib kirishidan oldingi darajadan ancha yuqoridir.
“AQSH afg‘on xalqidan so‘ramasdan turib, uning odamlar hayotini qutqarishi mumkin bo‘lgan 7 milliard dollar pulini muzlatib qo‘ydi, bu esa ularning sharoitini yanada yomonlashtirdi”, — dedi Litszyan.
“Tabiiy ofatlar va texnogen falokatlar fonida AQSH zudlik bilan afg‘on xalqini bo‘g‘ishdan to‘xtashi va unga Afg‘oniston milliy aktivlarini imkoni boricha tezroq qaytarishi kerak”, — dedi XXR TIV vakili.
2021-yil 14-aprelda AQSHning amaldagi prezidenti Jo Bayden Afg‘onistondagi harbiy amaliyotini to‘xtatish qarorini e’lon qildi, bu Amerika tarixidagi eng uzoq xorijiy harbiy kampaniyaga aylangan edi. Amerika qo‘shinlarini olib chiqish 2021-yilning may oyida boshlangan va 31-avgustda yakunlangan.
Yanvar oyida BMT Bosh kotibi Antoniu Guterrish Afg‘onistonning davlat moliyaviy aktivlarini blokdan chiqarish va mamlakat uchun gumanitar operatsiyalarni moliyalashtirishni ko‘paytirishga chaqirgandi. Biroq mart oyi oxirida Afg‘oniston aktivlarini blokdan chiqarish ehtimoli bilan bog‘liq vaziyat “Tolibon”ning o‘rta maktab o‘quvchi qizlarini maktabga qo‘ymaslik haqidagi qarori bilan yomonlashdi. Xususan, shu sababdan AQSH rasmiylari toliblar bilan rejalashtirilgan maslahatlashuvlardan bosh tortdi.
Izoh (0)