Rossiya prezidenti Vladimir Putinning aytishicha, “kollektiv G‘arbning misli ko‘rilmagan bosimi” Rossiya va Belarusni integratsiya sari undamoqda. Uning so‘zlariga ko‘ra, Rossiya va Belarus “mustahkam do‘stlik va o‘zaro yordamning shonli an’analarini ko‘paytiradi”.
“Kollektiv G‘arb tomonidan misli ko‘rilmagan siyosiy va sanksiyalar bosimi bizni birlashish jarayonlarini tezlashtirishga undamoqda”, — dedi Vladimir Putin Rossiya va Belarus hududiy forumidagi chiqishida. Rossiya prezidentining ta’kidlashicha, 2021-yil sentabrda kelishilgan 28 ta ittifoq dasturini amalga oshirish bo‘yicha ishlar “ritmik va jadval asosida” davom etmoqda va integratsiya uchun zarur bo‘lgan protseduralarning 40 foizi allaqachon bajarilgan.
Belarus prezidenti Aleksandr Lukashenkoning fikricha, G‘arb kompaniyalari bozorlardan chiqib ketganidan so‘ng ruslar va belaruslar uchun milliardlab rubllik joylar bo‘shab qolgan. U Belarusning qo‘shma korxonalar yaratishga o‘tish rejalarini e’lon qildi. Shu bilan birga, u mamlakatlar “bir-birlari bilan raqobatlashmoqchi emas”ligini yoki “takroriy ishlab chiqarish”ga tayyor emasligini ta’kidladi. Iyul oyida Rossiya va Belarus sanoat korxonalari ishini birlashtirish bo‘yicha kelishuv imzolashi mumkin.
2021-yilning noyabr oyida ikki davlat rahbarlari gaz, neft va elektr energiyasining umumiy bozorlarini yaratishni nazarda tutuvchi ittifoq dasturlari to‘g‘risidagi integratsiya farmonini imzolagan edi. Ittifoq davlatlar loyihasi doirasida yagona mudofaa makonini yaratish masalasi ham muhokama qilinmoqda.
Izoh (0)