O‘zbekistonning deyarli barcha viloyatlarida 29-iyun kuni havo harorati yuqori bo‘ldi. “O‘zgidromet” ayrim hududlardagi ob-havo ko‘rsatkichlari bo‘yicha ma’lumot berdi.
Xususan, Qashqadaryo viloyatida “Muborak” meteorologik stansiyasida mahalliy vaqt bilan soat 16:20 da havo harorati +45,9 darajaga yetgan. “Qarshi” meteorologik stansiyasida esa +43,4 havo harorati kuzatilgan.
Bundan tashqari, Buxoro viloyatidagi meteorologik stansiyalar hamda agrometeorologik postlarning har kuni soat 16:00—16:30 da kuzatilgan havo haroratlari bo‘yicha diagrammasi e’lon qilingan. Unga ko‘ra, “Og‘itma” meteostansiyasida havo harorati 46.6 darajani tashkil etgan.
Shuningdek, Sirdaryo viloyati hududida soat 14:00—16:00 oralig'ida eng yuqori haroratlar “Oqoltin” agropostida +46,0, Boyovut hamda Guliston agropostlarida +43,0 kuzatilgan.
Avvalroq “O‘zgidromet” 29-iyun, chorshanba kuni uchun ob-havo prognozini taqdim etgandi. Unda hududlarda 45 darajagacha issiq bo‘lishi aytilgan.
Eslatib o‘tamiz, O‘zbekistonda ushbu hafta anomal issiq saqlanib qoladi, faqat juma kuni issiq biroz pasayadi.
Izoh (0)