Farg‘ona viloyatida “Yangi O‘zbekiston yoshlari, birlashaylik” shiori ostida yoshlar festivali bo‘lib o‘tdi. Mazkur festivalning yakuniy marosimida ishtirok etgan “Daryo” muxbiri Azizjon Ermatov tadbirning e’tiborga molik lahzalarini suratga oldi.
Yoshlar ishlari agentligining viloyat boshqarmasi axborot xizmati rahbari Zarnigor Ubaydullayevaning ma’lum qilishicha, qariyb bir oy davom etgan festivalda 350 mingga yaqin yigit-qiz qatnashgan.
“Yoshlar oyligi” doirasida tashkillangan festival davomida besh bosqichli “Besh tashabbus olimpiadasi” o‘tkazildi. Mazkur olimpiadada mahallalarda istiqomat qiluvchi 248 ming nafar yosh 15 ta yo‘nalish bo‘yicha ishtirok etdi.
Besh tashabbus olimpiadasi doirasidagi tanlov va sport musobaqalarining respublika bosqichida Farg‘ona viloyati jamoalari 4 ta oltin, 7 ta kumush, 8 ta bronza medallarini qo‘lga kiritdi.
Bundan tashqari, 11 ta g‘olib jamoa o‘zlari istiqomat qiladigan mahallalarida sport maydonchalari qurilishi uchun maxsus sertifikatga ega bo‘ldi.
Farg‘ona shahridagi Islom Karimov nomidagi viloyat teatr-konsert saroyining ochiq sahnasida bo‘lib o‘tgan festival g‘oliblarini tantanali taqdirlash marosimida viloyatning barcha shahar va tumanlaridan kelgan 2 ming 500 nafardan ziyod yoshlar qatnashdi.
Tantanali taqdirlash marosimida mamlakat miqyosida o‘tkazilgan loyihalar, tanlov va sport musobaqalarida g‘oliblikni qo‘lga kiritgan farg‘onalik iste’dodli yoshlarga pul mukofotlari hamda esdalik sovg‘alari topshirildi.
Otabek Muhammadzohid, Sevinch Mo‘minova, Sardor Toirov, “VIA Marokand” guruhi, Jaloliddin Ahmadaliyev, Asilbek Nigmatov kabi san’atkorlar ishtirokida gala-konsert o‘tkazildi.
Yoshlar festivaliga go‘zal salyutlar bilan yakun yasaldi.
Izoh (0)