Ўзбекистоннинг айрим ҳудудларида ҳаво ҳарорати +46 градусгача кўтарилди

Ўзбекистоннинг деярли барча вилоятларида 29 июнь куни ҳаво ҳарорати юқори бўлди. «Ўзгидромет» айрим ҳудудлардаги об-ҳаво кўрсаткичлари бўйича маълумот берди.

Хусусан, Қашқадарё вилоятида «Муборак» метеорологик станциясида маҳаллий вақт билан соат 16:20 да ҳаво ҳарорати +45,9 даражага етган. «Қарши» метеорологик станциясида эса +43,4 ҳаво ҳарорати кузатилган.

Бундан ташқари, Бухоро вилоятидаги метеорологик станциялар ҳамда агрометеорологик постларнинг ҳар куни соат 16:00—16:30 да кузатилган ҳаво ҳароратлари бўйича диаграммаси эълон қилинган. Унга кўра, «Оғитма» метеостанциясида ҳаво ҳарорати 46.6 даражани ташкил этган.

Шунингдек, Сирдарё вилояти ҳудудида соат 14:00—16:00 оралиғида энг юқори ҳароратлар «Оқолтин» агропостида +46,0, Боёвут ҳамда Гулистон агропостларида +43,0 кузатилган.

Аввалроқ «Ўзгидромет» 29 июнь, чоршанба куни учун об-ҳаво прогнозини тақдим этганди. Унда ҳудудларда 45 даражагача иссиқ бўлиши айтилган.

Эслатиб ўтамиз, Ўзбекистонда ушбу ҳафта аномал иссиқ сақланиб қолади, фақат жума куни иссиқ бироз пасаяди.