АҚШ ушбу босқичда Россия ва Украина ўртасида тинчлик битимига эришиш учун имкониятларни кўрмаяпти. Бу ҳақда АҚШ Миллий разведкаси директори Аврил Хейнс маълум қилди, деб ёзади «РБК».
«Биласизми, ростини айтганда, бу босқичда биз иккала томон тинчлик ҳақида келишувга эришиши учун имкониятларни кўрмаяпмиз, буни, менимча, ҳамма тушуниб турибди», — деди у.
Шу билан бирга, Хейнснинг сўзларига кўра, Россия президенти Владимир Путиннинг «Украинанинг каттароқ қисмини босиб олиш» мақсадлари ўзгармаган ва у ҳамон унинг «нейтраллиги»га эришмоқчи. «Манзара анча нохуш бўлиб қолмоқда, Россиянинг Ғарбга муносабати эса кескинлашмоқда», — деди разведка раҳбари.
Украинадаги вазиятни тинч йўл билан тартибга солиш бўйича музокаралар мартдан буён давом этмоқда. Томонлар бир неча марта юзма-юз учрашди, уларнинг сўнггиси 29 март куни Истанбулда Россия, Украина ва Туркия ташқи ишлар вазирлари иштирокида бўлиб ўтди. Учрашув якунида томонлар аҳамиятли прогрессга эришилганини маълум қилди, бир кундан кейин эса Россия Мудофаа вазирлиги Куев ва Чернигов йўналишларидан қўшинлар олиб кетилганини эълон қилди.
Шунга қарамай, апрелда Украина музокараларни тўхтатди. Бу чет эл агентликлари томонидан Киев вилояти Буча шаҳридаги тинч аҳоли жасадлари фотосуратлари эълон қилинганидан кейин юз берди.
Россия президенти матбуот котиби Дмитрий Песков Москва махсус операцияларни музокаралар йўли билан якунлашни исташини таъкидлаганди. Шу билан бирга, у Украина бир кундаёқ жанговар ҳаракатлар тўхтатилишига эришиши мумкинлигини, бунинг учун ўз ҳарбийларига қуролларни туширишни буюриши ва Москванинг шартларини бажариши кифоялигини айтганди.
Изоҳ (0)