Германияда 101 ёшли концлагер собиқ қўриқчиси беш йилга қамалди. У Холокост давридаги жиноятлар учун судланган энг кекса шахс бўлди

Германияда суд 101 ёшли Йозеф Шюцни беш йиллик қамоққа ҳукм қилди, деб ёзади Meduza. Бранденбург суди уни 1942—1945 йилларда юз берган қотилликларга аралашишда айбдор деб топди, ўшанда 21 ёшли Шюц Ораниенбургдаги Заксенхаузен концлагерида қўриқчи бўлиб ишлаган.

DW ёзишича, Шюц Холокост даврида амалга оширилган жиноятлар учун суд олдида жавоб берган ва айбдор деб топилган энг кекса одамга айланди.

Прокуратура Шюцни лагердаги уч ярим мингдан ортиқ маҳбуснинг қатл қилинишига, совет ҳарбий асирларининг отиб ўлдирилишига ва маҳбусларнинг заҳарловчи газ ёрдамида ўлдирилишига алоқадорликда айблади. Прокуратура фикрича, Шюц қотилликларда «онгли равишда ва ўз ихтиёри билан» қатнашган.

Судланувчи 2021 йил қишидан буён давом этиб келган суд жараёни мобайнида ўз айбини рад этди ва лагер ҳудудида содир этилган оммавий қотилликлардан хабардор бўлмаганини айтди.

Энг паст бўғиндаги нацистларни жиноий таъқиб қилишни Германия ҳукумати тахминан 10 йил аввал бошлаган эди, ўшанда СС назоратчиси Иван Демьянюкка қарши иш қотилликка оид бевосита далилларсиз, балки нацистлар режимига шериклик қилгани ва алоқадор бўлгани учун холокостда иштирок этганлик бўйича айблов ҳукмини чиқариш имконини берувчи юридик прецедентни яратган эди. Демьянюк — Собибор концлагери собиқ қўриқчиси — 2011 йилда 28 мингдан зиёд одамнинг қатл қилинишида қатнашганликда айбдор деб топилганди. Бу суд Ишида бош далил Демянюкка тегишли СС гувоҳномаси бўлди, у ерда хизмат ўташ жойи сифатида Собибор кўрсатилганди.

2015 йилда «Освенцим» ҳисобчиси Оскар Грёнинг камида 300 минг маҳбуснинг ўлдирилишига алоқаодрликда айбланиб икки йилга ҳукм қилинганди. 2017 йилда Освенцим собиқ қўриқчиси Райнхольд Ханнинг 170 мингдан зиёд одамнинг ўлдирилишида қатнашгани учун беш йилга ҳукм қилинди. 2020 йилда Шуттгоф концлагери собиқ қўриқчиси Бруно Дей беш мингдан ортиқ кишининг ўлдирилишига кўмаклашгани учун шартли равишда икки йилга озодликдан маҳрум қилинганди. 2021 йилда собиқ котиба Ирмгард Фюрхнер Штуттгоф концлагерида 11 мингдан кўп одамнинг ўлдирилишида иштирок этганлик учун суд қаршисида жавоб берди. Судланувчиларнинг барчаси суд вақтида 90 ёшдан катта бўлган.