Rossiya BMT Xavfsizlik kengashi a’zosi bo‘lib qolishga haqi yo‘q, dedi Ukraina prezidenti Vladimir Zelenskiy.
Rossiya Xitoy, Buyuk Britaniya, AQSH va Fransiya bilan bir qatorda BMT Xavfsizlik kengashining doimiy a’zosi hisoblanadi. Tashkilot nizomida doimiy a’zoni tashkilotdan chiqarish jarayoni ko‘zda tutilmagan.
Zelenskiy, shuningdek, Rossiya delegatsiyasini “BMT Bosh Assambleyasidagi vakolatlari”dan mahrum qilishga chaqirdi. “Buning iloji bor, bu zarur, bu adolatli. Rossiyaning BMT Xavfsizlik kengashida qolishga haqi yo‘q”, — dedi Zelenskiy Xavfsizlik kengashi majlisida videoaloqa orqali so‘zlagan nutqida.
Ukraina yetakchisi fikricha, Rossiya tomoni BMT faoliyatida qatnashishda davom etmoqda va “hatto BMT Xavfsizlik kengashi doimiy a’zosi imtiyozlaridan foydalanmoqda”, bu lavozimni “siyosatchilarning sovuq urush tugashi bo‘yicha kaltabinligi tufayligina” egallab turibdi.
Rossiyaning BMTdagi doimiy vakili birinchi o‘rinbosari Dmitriy Polyanskiy Zelenskiyning Xavfsizlik kengashi majlisidagi “g‘arbparastlar tomonidan bosib yuborilgan” ishtiroki haqida gapirar ekan, Kiyevning vazifasi G‘arbda Ukraina mavzusidan “charchoq”ni bartaraf etishga urinish va “NATO sammiti ishtirokchilaridan ko‘proq qurol tilab olish” ekanini aytdi. “Buning uchun butun Ukraina agitatsiya va propagandasi safarbar qilinmoqda, har qanday qalbaki hujjatlar va sahnalashtirilgan tomoshalardan foydalanilmoqda”, — dedi diplomat va Moskva bunga qarshilik ko‘rsatishini qo‘shib qo‘ydi.
Zelenskiy Rossiyani BMT Xavfsizlik kengashidan chiqarib tashlashni avval ham taklif qilgan edi, aks holda, uning fikricha, organ o‘zini o‘zi tarqatib yuborishi kerak.
Rossiya doimiy vakili Vasiliy Nebenzya bunga javoban, nizomga ko‘ra, mamlakatni Xavfsizlik kengashi a’zoligidan mahrum qilib bo‘lmasligini ta’kidlagandi. AQSHning BMTdagi doimiy vakili Linda Tomas-Grinfild ham Amerika Kiyevning pozitsiyasini tushunishini, biroq Rossiyani a’zolikdan chiqarish imkoniyatini ko‘rmayotganini aytgandi.
Izoh (0)