AQSH prezidenti Jo Bayden ma’muriyati mamlakatda maymunchechakning tarqalishiga javoban o‘n minglab vaksina dozalarini tarqatishni rejalashtirmoqda. Bu haqda Washington Post gazetasi ushbu masaladan xabardor odamlarga tayanib xabar bermoqda.
Vaksina dozalari kasallanish holatlari eng ko‘p aniqlangan shtatlar o‘rtasida taqsimlanadi, dedi manbalar.
Rejaga ko‘ra, Gavayi, Massachusets, Yuta, Illinoys, Nyu-York, Rod-Aylend, Kaliforniya, Kolorado, Florida va Vashington shtatlari vaksinani birinchi oladigan shtatlar bo‘ladi.
Reja bo‘yicha Jynneos vaksinasining jami 25 — 30 ming dozasi ajratilishi kerak. Jynneos — federal regulyatorlar tomonidan maymunchechakning oldini olish uchun maxsus tasdiqlangan yagona vaksina.
“Kelgusi hafta yoki undan ko‘proq vaqt ichida mavjud Jynneos vaksinalarining bir qismini tarqatish rejalashtirilmoqda”, — dedi nashr suhbatdoshlaridan biri.
Rasmiy ma’lumotlarga ko‘ra, hozirgacha Qo‘shma Shtatlarda 306 kishida maymunchechak qayd etilgan. Ammo nashr bilan suhbatlashgan ekspertlar asl holatlar bundan ko‘proq, deb hisoblamoqda.
Eslatib o‘tamiz, JSST maymunchechak tarqalishini xalqaro ahamiyatga molik favqulodda holat emas, degan xulosaga kelgandi.
Izoh (0)