Anqara Madridda erishilgan kelishuv doirasida Turkiyada terrorchilikda gumonlangan 33 kishining Finlyandiya va Shvetsiyadan chiqarib yuborilishini talab qiladi. Bu haqda Turkiya adliya vaziri Bekir Bo‘zdag‘ ma’lum qildi.
“Biz yangi kelishuvga ko‘ra, bu mamlakatlardan terrorchilarni ekstraditsiya qilishga intilamiz”, — deya vazirning so‘zlarini keltiradi Arab News.
Turkiya, Shvetsiya va Finlyandiya rahbarlari tomonidan imzolangan uch tomonlama memorandumda, xususan, Xelsinki va Stokgolm Anqaraga terrorizmga qarshi kurashda yordam berishga sodiq ekani hamda Turkiyada terrorchi deb hisoblangan kurd guruhlarini qo‘llab-quvvatlamasligi qayd etilgan. Bundan tashqari, NATOga kirishga harakat qilayotgan bu ikkala davlat Turkiyaning bir qator kurd faollarini ekstraditsiya qilish bo‘yicha so‘rovlarini ham ko‘rib chiqadi.
28-iyun kuni kechqurun Turkiya Shvetsiya va Finlyandiyani NATOga kirishiga qarshi e’tirozlarini qaytarib olgani ma’lum bo‘ldi. Madriddagi alyans sammitida ikkala Skandinaviya davlati ham alyansga qo‘shilish taklifini olishi kutilmoqda. Keyinchalik, tomonlar kirish shartlari bo‘yicha kelishib olishi kerak. Agar barcha a’zo davlatlarning parlamentlari ushbu qarorni ratifikatsiya qilsa, Shvetsiya va Finlyandiya NATOga a’zo bo‘ladi
Izoh (0)