“Shvetsiya hukumati NATOga a’zo bo‘lish imkoniyatini ko‘rib chiqish jarayonida Turkiyaning xavfsizlik bilan bog‘liq muammolarini hisobga oladi va Anqara bilan hamkorlikni davom ettiradi”, dedi dushanba kuni Shvetsiya bosh vaziri Magdalena Andersson.
“Biz Turkiyaning xavfsizlik va terrorizmga qarshi kurash bilan bog‘liq bo‘lgan masalalardagi xavotirini juda jiddiy qabul qilamiz. Biz Turkiya bilan ikki va uch tomonlama muloqot olib bormoqdamiz” — deya qo‘shimcha qilgan Shvetsiya bosh vaziri NATO bosh kotibi Yens Stoltenberg bilan bo‘lgan qo‘shma matbuot anjumanida.
O‘z navbatida, NATO bosh kotibi Shvetsiyaning bu pozitsiyasini olqishlagan.
“Shvetsiya hukumatining Turkiyani tashvishga solayotgan muammolarni muhokama qilishga tayyorligidan mamnunman”, — degan Stoltenberg.
Stoltenbergning so‘zlariga ko‘ra, “asosiy maqsad — Finlyandiya va Shvetsiyani NATOning to‘laqonli a’zosi sifatida tezroq ittifoqqa qabul qilish uchun imkon qadar tezroq yechim topish”.
Finlyandiya va Shvetsiya 18-may kuni NATOga kirish uchun ariza topshirgandi. Biroq Turkiya hozirda ushbu arizalarni ko‘rib chiqishga to‘sqinlik qilmoqda. Anqaraning Skandinaviya davlatlariga qarshi bir qancha da’volari bor: xususan, Turkiya Shvetsiya va Finlyandiyani Turkiyada terrorchi deb topilgan kurd guruhlarini qo‘llab-quvvatlashda ayblaydi.
Izoh (0)