Elektr energiyasi taqchilligi sharoitida Yaponiya hukumati aholidan elektr uzilishining oldini olish uchun konditsionerlarni o‘chirishni so‘radi, deb yozmoqda Deutsche Welle.
Nashrning yozishicha, Yaponiyada to‘rtinchi kun ketma-ket kuchli jazirama kuzatilgan va shaharliklar najot izlab konditsionerlarni yoqishgan. Rasmiylar elektr energiyasi iste’molining ortishi elektr toki uzilishiga olib kelishi mumkinligidan ogohlantirdi. Mamlakatda havo harorati Selsiy bo‘yicha 36 darajaga chiqishi prognoz qilingan.
Rasmiylar dastlab Tokio aholisidan elektr energiyasi iste’molini kamaytirishni so‘radi. Biroq jazirama ba’zilar uchun halokatli bo‘lganidan keyin hukumat energiyani tejash borasidagi ambitsiyalarini pasaytirdi.
Tokioda jazirama tufayli kasalxonaga yotqizilganlar soni 76 nafarga yetgan, tez yordam xizmati xabariga ko‘ra, kamida ikki kishi jaziramadan vafot etgan. Shu munosabat bilan rasmiylar Tokio aholisidan energiyani me’yorida tejashni so‘radi.
“Odamlardan energiya tejashni so‘raganimiz uchun konditsionerlarini o‘chirayotgan keksalar ham bor. Lekin, iltimos, hozirgi havoda issiq urishidan saqlanish uchun ko‘proq suv ichishni unutmang”, — deydi savdo va sanoat vaziri Koiti Xagiuda matbuot anjumanida.
Hukumat Tokio va unga yaqin sakkizta prefekturada energiya ta’minoti minimal darajaga yetishi mumkinligidan ogohlantirdi. Agar zaxira quvvati eng quyi chegaraga yetsa, aholi elektr ta’minotida uzilishlarga duch kelishi mumkin.
Eslatib o‘tamiz, Yaponiya 2018-yilda ham xuddi shunday issiqlik to‘lqinini boshidan kechirgan edi. O‘shanda Tokioda tarixda birinchi marta 40 darajadan yuqori harorat qayd etilgan va haroratning sakrashi “tabiiy ofat” deb e’lon qilindi.
Izoh (0)