O‘zbekistonda to‘qimachilik kam xarajat bilan oltindan ham ko‘p daromad keltiradigan soha hisoblanadi. Bu haqda Shavkat Mirziyoyev 28-iyun kuni videoselektor yig‘ilishida aytib o‘tdi.
Prezident matbuot kotibining xabar berishicha, yig‘ilishda ilmga asoslangan urug‘chilik va agrotexnologiyalar hisobiga paxta hosildorligi va hajmini kamida 30 foizga oshirish, paxtani chuqur qayta ishlab, to‘qimachilik mahsulotlari eksportini kamida 2 baravarga ko‘paytirish muhokama qilindi.
“Bu — iqtisodiyotimiz uchun juda katta imkoniyat va zaxiradir. To‘qimachilik bizga kam xarajat bilan oltindan ham ko‘p daromad keltiradigan soha hisoblanadi. Shuning uchun biz sohada to‘liq klaster tizimini joriy etdik. Bugungi kunda paxta tolasini o‘zimizda 100 foiz qayta ishlash yo‘lga qo‘yildi (besh yil avval 40 foiz tola qayta ishlangan).
Sohani qo‘llab-quvvatlash uchun so‘nggi uch yilda to‘qimachilik klasterlariga 23 trillion so‘mdan ziyod imtiyozli mablag‘lar ajratildi. Bundan tashqari, klasterlarning o‘zlari ham qariyb 7 trillion so‘m xususiy investitsiyalar yo‘naltirdilar. Natijada 350 ga yaqin yirik fabrikalar ishga tushirildi. Ishlab chiqarish hajmi 5 barobarga oshdi, eksport esa 4 barobarga o‘sib, qariyb 3 milliar dollarga yetdi”, — degan prezident.
Ta’kidlanishicha, bugungi kunda O‘zbekistonda tolani qayta ishlash quvvati 1 million 300 ming tonnaga yetgan, lekin 1 million tonna tola ishlab chiqarilmoqda. Ya’ni, hozirning o‘zida 300 ming tonna tola yetmayapti. Kelgusi besh yilda bu ehtiyoj yana 600 ming tonnaga oshadi. Shundan 300 ming tonnasi sun’iy tola bo‘lsa, yana kamida 300 ming tonna paxta tolasi zarur.
“Nima uchun Turkiyaning paxta maydoni bizdan 2 karra kam bo‘lsada, tolani deyarli teng hajmda ishlab chiqaradi? Buning asosiy sababi — hali ilmga, zamonaviy texnologiyalarga joylardagi rahbarlarning e’tibori va mas’uliyati past”, — degan davlat rahbari.
Shavkat Mirziyoyev qayta ishlash borasidagi ishlar ahvoliga ham to‘xtalib o‘tgan. Qayd etilishicha, ip-kalavani tayyor mahsulotgacha qayta ishlash darajasi O‘zbekistonda 23 foizni tashkil etadi. Buning oqibatida yiliga 9 milliard dollar daromad boy berilmoqda.
Agar mutasaddilar tuman hokimlari va klasterlar bilan ishlarni to‘g‘ri tashkil qilsa, to‘qimachilikdagi ish o‘rinlarini hozirgi 400 mingdan bemalol 1 millionga ko‘paytirish imkoniyati borligi ko‘rsatib o‘tildi.
Xabarda aytilishicha, paxta hosildorligini oshirish bo‘yicha yangi tizim joriy qilinadi. Prezident topshirig‘iga ko‘ra tarmoq korxonalari, klasterlar, olimlar bilan bir necha bor uchrashuvlar o‘tkazildi. Ularda bildirilgan fikr va takliflar asosida aniq yechimlar belgilab olindi.
Izoh (0)