Toshkent shahrida 27-iyun kuni noqonuniy muomaladan musodara qilingan 1 tonna 933 kg 695 gr giyohvandlik vositasini yo‘q qilish tadbiri o‘tkazildi. Bu haqda “Daryo” muxbiri xabar bermoqda.
Davlat xavfsizlik xizmati tomonidan tashkil etilgan tadbirda bugungi kunda dunyodagi narkovaziyat, giyohvandlik vositalarini aniqlash va yo‘q qilish borasida bajarilayotgan ishlar to‘g‘risida ma’lumot berildi. Vazirlar Mahkamasi huzuridagi Narkotik moddalarni nazorat qilish milliy axborot – tahlil markazi xalqaro bo‘lim boshlig‘i Sherzod Arabovning aytishicha, mintaqadagi vaziyat murakkabligicha qolmoqda.
“Respublikamizda va umuman mintaqada narkovaziyat jiddiyligicha qolmoqda. Buning sabablaridan biri keyingi yillarda yangi turdagi sintetik giyohvandlik vositalari va yangi turdagi psixfaol moddalarning tarqalib borishi hisoblanadi. Bundan tashqari, internet makoni - darknet orqali ham bunday moddalar keng targ‘ib qilinishi va muomalada bo‘lishi vaziyatni murakkablashtirmoqda. Shuningdek, O‘zbekiston o‘zining geografik joylashuvi va rivojlangan transport infratuzilmasiga ko‘ra global narkotrafiklardan biri – shimoliy yo‘lakcha bo‘ylab tranzit mamlakat hisoblanadi. Shu nuqtayi nazardan so‘ngi yillarda huquq - tartibot idoralari tomonidan birinchi navbatda chegara o‘tkazish punktlari salohiyatini muhtahkamalash, ularning moddiy-texnik bazasini yaxshilash masalalarida xorijiy sheriklarimiz bilan birgalikda ishlar olib boryapmiz. Xususan, soha xodimlari malakasini oshirib boryapmiz.
Narkotiklarni aniqlash ko‘proq chegara hududlari hissasiga to‘g‘ri kelmoqda. Jumladan, Afg‘oniston, qo‘shni Tojikiston va Qirg‘iziston bilan chegara hududlarda katta miqdordagi narkotik moddalarni musodara qilish holatlariga guvohi bo‘lyapmiz”, – dedi markaz mas’uli.
Sherzod Arabovning ta’kidlashicha, so‘ngi vaqtda O‘zbekistonda narkojinoyatlar soni ortib bormoqda.
“2021-yilda jami 7 ming 142 ta narkojinoyatlar fosh qilingan. Ya’ni ko‘rsatgichlar o‘tgan yilga nibatan 18,4 foizga oshgan. Bunda eng xavotirli masala, yoshlarning narkojinoyatlarga aralashish salmog‘i yildan yilga ortib bormoqda. Xususan, Toshkent shahrida narkojinoyatlar bo‘yicha sudlangan fuqarolarning har ikki nafaridan biri yoshlar bo‘lib chiqyapti. Bu holat bizni albatt,a jiddiy xavotirga solib kelimoqda”, - dedi u.
Ma’lumot uchun, O‘zbekistonda giyohvandlikka qarshi kurashish bo‘yicha bir qator qonun hujjatlari amal qilmoqda. Jumladan, respublika 1995-yilning fevral oyida BMTning giyohvandlik vositalari va psixotrop moddalarning noqonuniy muomalasiga qarshi kurash to‘g‘risidagi 1961, 1971 va 1988-yillardagi konvensiyalariga qo‘shilgan. Mamlakatda 1999-yil 19-avgust kuni “Giyohvandlik vositalari va psixotrop moddalar to‘g‘risida”gi qonun qabul qilingan. 2021-yil yanvar oyidan boshlab narkologiya sohasidagi munosabatlarni tartibga soluvchi “Narkologik kasalliklar profilaktikasi va davolash to‘g‘risida”gi qonun kuchga kirgan.
Izoh (0)