Avval xabar berilganidek, 25-iyun kuni O‘zbekiston Konstitutsiyasiga o‘zgartishlar kiritish to‘g‘risidagi qonun loyihasi jamoatchilik muhokamasiga qo‘yildi.
Unga ko‘ra, Konstitutsiyada O‘zbekiston barcha davlatlar bilan do‘stona va tinchliksevarlik tashqi siyosatini olib borishi belgilab qo‘yilmoqda.
Prezident Shavkat Mirziyoyev tomonidan 2022-yil 20-iyundagi Konstitutsiyaviy komissiya a’zolari bilan uchrashuvidagi ma’ruzada “Asosiy qonunimizga O‘zbekiston barcha davlatlar, eng avvalo, o‘zining yaqin qo‘shnilari bilan tinchlikparvar va do‘stona siyosat yuritishi, uning tashqi siyosati inson huquq va erkinliklarini hurmat qilish, davlatlarning hududiy yaxlitligiga oid prinsip va normalarga asoslanishi haqidagi moddani qo‘shish” taklifi kiritildi.
Bugun O‘zbekiston o‘zining misli ko‘rilmagan ochiqligi va jadalligi bilan ajralib turgan izchil, aniq va konstruktiv tashqi siyosat yuritmoqda. Mamlakatimiz tashqi siyosiy faoliyatining asosiy vazifalaridan biri – o‘z hududi atrofida tinchlik, barqarorlik va xavfsizlik muhitini shakllantirish hisoblanadi. Shu nuqtayi nazardan, mamlakatimizda Markaziy Osiyo davlatlari bilan do‘stona, yaqin qo‘shnichilik va o‘zaro manfaatli aloqalarni rivojlantirish va mustahkamlash asosiy ustuvor tashqi siyosiy yo‘nalish sifatida belgilandi.
Mintaqa davlatlari yetakchilari o‘rtasidagi siyosiy muloqot o‘zaro ishonchga asoslangan muntazamlik va doimiylik kasb etdi. Bunday muloqotlar davomida Markaziy Osiyo davlatlarini qiziqtiradigan xavfsizlik, iqtisodiyot, investitsiya, turizm, madaniyat, sog‘liqni saqlash va ekologiya sohalarida mintaqaviy va xalqaro ahamiyatga molik muhim qo‘shma qarorlar qabul qilinmoqda. Markaziy Osiyo davlatlari bilan tashqi savdoning umumiy hajmdagi ulushi 2017-yilda 10,3 foizni tashkil etgan bo‘lsa, 2021-yilda ushbu ko‘rsatkich 15,1 foizga yetgan.
Binobarin, Konstitutsiyaga barcha davlatlar bilan do‘stona va tinchliksevarlik tashqi siyosatini olib borishga doir mazkur yangi prinsipni kiritilishi mazkur ishlarning o‘ziga xos mantiqiy davomi bo‘ladi hamda mustahkam konstitutsiyaviy-huquqiy asoslarini shakllantiradi.
Izoh (0)