Toshkentda fuqaroni Tojikistonga o‘qishga kiritib, keyin O‘zbekistondagi OTMga ko‘chirib berish uchun pul olgan shaxs ushlandi

Toshkent shahrining Olmazor tumanida qo‘shni davlat institutiga o‘qishga kiritib bermoqchi bo‘lgan shaxs ushlandi, deb xabar beradi Bosh prokuratura huzuridagi departament.

Ma’lum qilinishicha, departamentning Olmazor tuman bo‘limi tomonidan tezkor tadbir o‘tkazilgan. Tadbirda Sh.J. ismli shaxs fuqaro J.dan tanishlari orqali Tojikistondagi Pedagogika institutiga o‘qishga kiritib, keyinchalik o‘qishini O‘zbekistondagi oliy ta’lim muassasasiga 2-bosqichdan ko‘chirtirib berish evaziga 3,2 ming dollar olgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

Avvalroq Qashqadaryoda ikki kishini o‘qishga kiritib qo‘yish uchun 10 ming dollar pora olgan shaxs qo‘lga tushgani, Farg‘onada Toshkent tibbiyot akademiyasiga o‘qishga kiritib qo‘yish uchun 10 ming dollar olgan shaxs ushlangani to‘g‘risida xabar berilgandi.