Ўзбекистонда тўқимачилик кам харажат билан олтиндан ҳам кўп даромад келтирадиган соҳа ҳисобланади. Бу ҳақда Шавкат Мирзиёев 28 июнь куни видеоселектор йиғилишида айтиб ўтди.
Президент матбуот котибининг хабар беришича, йиғилишда илмга асосланган уруғчилик ва агротехнологиялар ҳисобига пахта ҳосилдорлиги ва ҳажмини камида 30 фоизга ошириш, пахтани чуқур қайта ишлаб, тўқимачилик маҳсулотлари экспортини камида 2 бараварга кўпайтириш муҳокама қилинди.
«Бу — иқтисодиётимиз учун жуда катта имконият ва захирадир. Тўқимачилик бизга кам харажат билан олтиндан ҳам кўп даромад келтирадиган соҳа ҳисобланади. Шунинг учун биз соҳада тўлиқ кластер тизимини жорий этдик. Бугунги кунда пахта толасини ўзимизда 100 фоиз қайта ишлаш йўлга қўйилди (беш йил аввал 40 фоиз тола қайта ишланган).
Соҳани қўллаб-қувватлаш учун сўнгги уч йилда тўқимачилик кластерларига 23 триллион сўмдан зиёд имтиёзли маблағлар ажратилди. Бундан ташқари, кластерларнинг ўзлари ҳам қарийб 7 триллион сўм хусусий инвестициялар йўналтирдилар. Натижада 350 га яқин йирик фабрикалар ишга туширилди. Ишлаб чиқариш ҳажми 5 баробарга ошди, экспорт эса 4 баробарга ўсиб, қарийб 3 миллиар долларга етди», — деган президент.
Таъкидланишича, бугунги кунда Ўзбекистонда толани қайта ишлаш қуввати 1 миллион 300 минг тоннага етган, лекин 1 миллион тонна тола ишлаб чиқарилмоқда. Яъни, ҳозирнинг ўзида 300 минг тонна тола етмаяпти. Келгуси беш йилда бу эҳтиёж яна 600 минг тоннага ошади. Шундан 300 минг тоннаси сунъий тола бўлса, яна камида 300 минг тонна пахта толаси зарур.
«Нима учун Туркиянинг пахта майдони биздан 2 карра кам бўлсада, толани деярли тенг ҳажмда ишлаб чиқаради? Бунинг асосий сабаби — ҳали илмга, замонавий технологияларга жойлардаги раҳбарларнинг эътибори ва масъулияти паст», — деган давлат раҳбари.
Шавкат Мирзиёев қайта ишлаш борасидаги ишлар аҳволига ҳам тўхталиб ўтган. Қайд этилишича, ип-калавани тайёр маҳсулотгача қайта ишлаш даражаси Ўзбекистонда 23 фоизни ташкил этади. Бунинг оқибатида йилига 9 миллиард доллар даромад бой берилмоқда.
Агар мутасаддилар туман ҳокимлари ва кластерлар билан ишларни тўғри ташкил қилса, тўқимачиликдаги иш ўринларини ҳозирги 400 мингдан бемалол 1 миллионга кўпайтириш имконияти борлиги кўрсатиб ўтилди.
Хабарда айтилишича, пахта ҳосилдорлигини ошириш бўйича янги тизим жорий қилинади. Президент топшириғига кўра тармоқ корхоналари, кластерлар, олимлар билан бир неча бор учрашувлар ўтказилди. Уларда билдирилган фикр ва таклифлар асосида аниқ ечимлар белгилаб олинди.
Изоҳ (0)