“Daryo” sayohati: Yashillikka burkangan, haykal va bayroqlarga to‘la Tbilisi

Gruziya Qora dengiz sharqiy sohilida Kavkazortining g‘arbida joylashgan bo‘lib, Yevropa va Osiyoning chorrahasi, deb ataladi. Iqlimi har bir qismida turlicha — sharqiy dasht qismi quruq, Kavkazda sovuq va Qora dengiz sohilida iliq. Unda 14 viloyat mavjud bo‘lib, eng ko‘p sayyohlar keladigan shaharlari sirasiga Tbilisi, Batumi, Borjomi, Gagra, Kobuleti, Mtsxeta, Kazbegi tog‘larini kiritish mumkin.

Gruziya o‘zining oshxonasi va sharoblari bilan mashhur. Betakror manzaralar, tarixiy qal’alar, ibodatxonalar va soborlar noyob me’morchilik namunalariga ega. Bu yerga sayyohlar yozda dengiz, bahor va kuz mavsumida asosan qal’alar, muzeylar va boshqa diqqatga sazovor joylarga ekskursiyalar uyushtirish uchun keladi. Gruziya poytaxti Tbilisi bo‘lib, u yerda hozirda 1,2 milliondan ortiq kishi istiqomat qiladi. Tarixchilarning ta’kidlashicha, zamonaviy Tbilisi hududida odamlarning joylashishi 5 ming yil oldin mavjud bo‘lgan. Davlat rasmiy tili kartveli tillar oilasiga mansub gruzin tili hisoblanadi.

Kura daryosi shaharni ikki qismga ajratadi. Sayohatchilar eski shaharni tomosha qilish uchun boradi. Qadimiy ko‘chalarni mahalliy yopiladigan nonlarning yoqimli hididan mast bo‘lgan holda sayr qilishning o‘z gashti bor. Aynan shu hududda mashhur “Oltingugurtli vannalar”, Darejan malikasi saroyi va Tsminda Sameba sobori joylashgan.

Gruziya jamoat transportiga avtobuslar, mikroavtobuslar, taksilar, shuningdek, Tbilisidagi metroni kiritish mumkin. Avtobus va mikroavtobuslar jamoat transportining eng muhim shakli bo‘lib, ularda shaharning istalgan joyiga borishingiz mumkin. Narxi 1 lari (taxminan 3 688 so‘m). Ular maxsus to‘xtash joylarida to‘xtab, jadvalga muvofiq faoliyat ko‘rsatadi. Shaharlarda taksi xizmatlaridan ham foydalanish mumkin. Ularning o‘rtacha narxi 2-3 lari.

“Daryo” fotomuxbiri mamlakat poytaxtidagi sayohati davomida diqqatga sazovor lahzalarni kadrga muhrladi.