«Дарё» саёҳати: Яшилликка бурканган, ҳайкал ва байроқларга тўла Тбилиси

Грузия Қора денгиз шарқий соҳилида Кавказортининг ғарбида жойлашган бўлиб, Европа ва Осиёнинг чорраҳаси, деб аталади. Иқлими ҳар бир қисмида турлича — шарқий дашт қисми қуруқ, Кавказда совуқ ва Қора денгиз соҳилида илиқ. Унда 14 вилоят мавжуд бўлиб, энг кўп сайёҳлар келадиган шаҳарлари сирасига Тбилиси, Батуми, Боржоми, Гагра, Кобулети, Мцхета, Казбеги тоғларини киритиш мумкин.

Грузия ўзининг ошхонаси ва шароблари билан машҳур. Бетакрор манзаралар, тарихий қалъалар, ибодатхоналар ва соборлар ноёб меъморчилик намуналарига эга. Бу ерга сайёҳлар ёзда денгиз, баҳор ва куз мавсумида асосан қалъалар, музейлар ва бошқа диққатга сазовор жойларга экскурсиялар уюштириш учун келади. Грузия пойтахти Тбилиси бўлиб, у ерда ҳозирда 1,2 миллиондан ортиқ киши истиқомат қилади. Тарихчиларнинг таъкидлашича, замонавий Тбилиси ҳудудида одамларнинг жойлашиши 5 минг йил олдин мавжуд бўлган. Давлат расмий тили картвели тиллар оиласига мансуб грузин тили ҳисобланади.

Кура дарёси шаҳарни икки қисмга ажратади. Саёҳатчилар эски шаҳарни томоша қилиш учун боради. Қадимий кўчаларни маҳаллий ёпиладиган нонларнинг ёқимли ҳидидан маст бўлган ҳолда сайр қилишнинг ўз гашти бор. Айнан шу ҳудудда машҳур «Олтингугуртли ванналар», Дарежан маликаси саройи ва Цминда Самеба собори жойлашган.

Грузия жамоат транспортига автобуслар, микроавтобуслар, таксилар, шунингдек, Тбилисидаги метрони киритиш мумкин. Автобус ва микроавтобуслар жамоат транспортининг энг муҳим шакли бўлиб, уларда шаҳарнинг исталган жойига боришингиз мумкин. Нархи 1 лари (тахминан 3 688 сўм). Улар махсус тўхташ жойларида тўхтаб, жадвалга мувофиқ фаолият кўрсатади. Шаҳарларда такси хизматларидан ҳам фойдаланиш мумкин. Уларнинг ўртача нархи 2-3 лари.

«Дарё» фотомухбири мамлакат пойтахтидаги саёҳати давомида диққатга сазовор лаҳзаларни кадрга муҳрлади.