“O‘zbekistonda muxolifat bor” — Senat raisi

O‘zbekistonda jamoatchilik tomonidan ijtimoiy tarmoqlarda bildirilayotgan fikrlar muxolifat hisoblanadi. Bu haqda Oliy Majlis Senati raisi Tanzila Norboyeva “Amerika ovozi”ga bergan intervyusida ma’lum qildi.

“Amerika ovozi” muxbirining “O‘zbekistonda muxolifat bormi” degan savoliga Senat raisi Tanzila Norboyeva javob berar ekan, xalqning o‘zi ham muxolif bo‘lishini aytib o‘tdi.

“O‘zbekistonda nega muxolifat yo‘q, bor-ku, hamma joyda tanqid bo‘lyapti-ku. Lekin bu alohida institutsional tarzda tashkil topishi o‘zining vaqtini topsa kerak. Hozir fikr erkinligi bor. Juda ham keskin fikrlar bildiriladi. Parlamentga ham, rahbariyatga ham, hukumatgayam va hokazo. Shuning o‘zi muxolifat emasmi? Xalqning o‘zi ham muxolifat bo‘lishi mumkin. Rivojlangan mamlakatning ham internetini ochib ko‘ring, hattoki eng rivojlangan, hamma to‘q mamlakatda ham o‘z xalqining norozichiligi bo‘ladi. Buni normal holat deb hisoblayman”, — deydi Senat raisi.

Norboyeva aholi tomonidan yuqori organlarga yo‘llanadigan murojaatlar o‘z egasiga yetib borishi haqida gapirib, endilikda bu narsaga hojat yo‘qligi, yuqori organ vakillari ham “past”ga tushganini aytdi.

“Hozir yuqori organlar ham “past”ga tushgan. OAVning kuzatsangiz, vazir, Oliy sud raisi, bosh prokuror va boshqa yuqori organ vakillari “past”ga tushishgan. Hozir aholi orasida “yuqori” idora, “past” qatlam bo‘lmasligi uchun prezident Mirziyoyev barcha amaldorlarni “past”ga tushirgan. Fuqarolar qaysi idoraga e’tiroz bilan bormasin ularning dardi eshitiladi”, — deydi u.

Avvalroq Tanzila Norboyeva “Amerika ovozi”ga bergan intervyusida Shavkat Mirziyoyev bosh vazir lavozimida ishlagan vaqtlaridan majburiy mehnatga qarshi kurashish boshlanganini aytgani haqida xabar berilgandi.