“Ayrim rahbarlarning harakati orqali korrupsiya boshlangani haqida yetarli ma’lumotlarim bor” — Shavkat Mirziyoyev

Shavkat Mirziyoyev 28-iyun kuni urug‘chilik va agrotexnologiyalar hisobiga paxta ishlab chiqarish hajmini oshirish hamda paxtani chuqur qayta ishlash asosida to‘qimachilik mahsulotlari eksportini ko‘paytirish yuzasidan o‘tkazilgan yig‘ilishda soha mas’ullariga bir qator topshiriqlar berdi. Bu haqda Prezident matbuot xizmati xabar qildi.

Qayd etilishicha, agar tomchilatib sug‘orishni joriy etish sohasida erkin raqobat bo‘lsa, ilm bilan yondashilsa, ushbu texnologiyani joriy etish xarajatini gektariga 15-20 million so‘mga bemalol tushirish mumkin bo‘ladi. Hozirda 27 million so‘m.

“Lekin katta fojia – ayrim rahbarlar bu ezgu islohotga o‘ziga yaqin ta’minotchilar va bilimsiz odamlarni aralashtiryapti. Shu orqali korrupsiya boshlangani haqida menda yetarli ma’lumotlar bor”, — degan prezident.

Moliya va Suv xo‘jaligi vazirliklariga bir hafta muddatda:

• yangi ishga tushirilgan elektron portalga hamma ta’minotchilarni kiritish;
• taklif qilinayotgan suv tejovchi texnologiyalar narxi va xizmatlar sifatini baholab boradigan shaffof tizim yaratish topshirilgan.