Shavkat Mirziyoyev raisligida 28-iyun kuni o‘tkazilgan yig‘ilishda to‘qimachilik sohasida mutaxassislar tayyorlash, ilm va izlanish bo‘yicha To‘qimachilik va yengil sanoat instituti hamda O‘zbekiston—Koreya to‘qimachilik texnoparki yaxlit tizim asosida ishlashi belgilandi. Bu haqda Prezident matbuot xizmati xabar qildi.
Qayd etilishicha, Toshkent to‘qimachilik va yengil sanoat institutiga Savdo-sanoat palatasi raisi Davron Vahobov rektor etib tayinlangan. Institutda yangi o‘quv yilidan:
- 3 va 4-kurs talabalarini o‘qitishda “dual” ta’lim tizimi joriy qilinadi;
- o‘quvchilar haftaning uch kunida institutda nazariy darslar, qolgan uch kunida to‘qimachilik texnoparki va korxonalarda amaliy o‘quv mashg‘ulotlar asosida o‘qitiladi;
- nufuzli xorijiy to‘qimachilik oliygohlari bilan hamkorlikda kamida 6 ta yo‘nalishda talabalar almashish dasturi yo‘lga qo‘yiladi.
Eslatib o‘tamiz, Davron Vahobov Savdo-sanoat palatasi raisi etib 25-mart kuni saylangandi. Bunga qadar u “O‘zto‘qimachiliksanoat” uyushmasi raisining birinchi o‘rinbosari lavozimida ishlab kelgan.
Ma’lumot uchun, Davron Vahobov 1980-yilda Toshkent viloyatida tug‘ilgan, ma’lumoti oliy — 2001-yilda Toshkent kimyo-texnologiya institutini, 2003-yilda Toshkent iqtisodiyot universitetini, 2007-yilda esa Toshkent davlat yuridik universitetini tamomlagan.
Mehnat faoliyati davomida Davron Vahobov “Oqsaroy Tekstil” , “Zarbdor Tekstil”, “Oqsaroy Vorteks”, “Osteks Tekstil Jizzax”, “Sardoba Oqsaroy Tekstil” kabi yirik to‘qimachilik loyihalarida ishlagan. 2020-yilning noyabrida “O‘zto‘qimachiliksanoat” uyushmasi raisiga birinchi o‘rinbosar tayinlangan edi.
Izoh (0)