Шавкат Мирзиёев 28 июнь куни уруғчилик ва агротехнологиялар ҳисобига пахта ишлаб чиқариш ҳажмини ошириш ҳамда пахтани чуқур қайта ишлаш асосида тўқимачилик маҳсулотлари экспортини кўпайтириш юзасидан ўтказилган йиғилишда соҳа масъулларига бир қатор топшириқлар берди. Бу ҳақда Президент матбуот хизмати хабар қилди.
Қайд этилишича, агар томчилатиб суғоришни жорий этиш соҳасида эркин рақобат бўлса, илм билан ёндашилса, ушбу технологияни жорий этиш харажатини гектарига 15-20 миллион сўмга бемалол тушириш мумкин бўлади. Ҳозирда 27 миллион сўм.
«Лекин катта фожиа – айрим раҳбарлар бу эзгу ислоҳотга ўзига яқин таъминотчилар ва билимсиз одамларни аралаштиряпти. Шу орқали коррупция бошлангани ҳақида менда етарли маълумотлар бор», — деган президент.
Молия ва Сув хўжалиги вазирликларига бир ҳафта муддатда:
- янги ишга туширилган электрон порталга ҳамма таъминотчиларни киритиш;
- таклиф қилинаётган сув тежовчи технологиялар нархи ва хизматлар сифатини баҳолаб борадиган шаффоф тизим яратиш топширилган.
Изоҳ (0)