Dushanba, 27-iyun kuni Rossiya kuchlari Ukrainaning Poltava viloyatiga raketa hujumlari uyushtirdi. Ular viloyatning Kremenchuk shahridagi fuqarolik obyektiga zarba berdi.
“Rossiya harbiylari Poltava viloyatining Kremenchuk shahridagi savdo markaziga raketa hujumi uyushtirdi”, dedi Ukraina prezidenti Vladimir Zelenskiy. Uning so‘zlariga ko‘ra, o‘sha paytda savdo markazida mingdan ortiq odam bo‘lgan. “Jabrlanganlar sonini tasavvur qilib bo‘lmaydi. Bu yerda Rossiya armiyasi uchun hech tahdid yo‘q edi. Qolaversa bu yer hech qanday strategik ahamiyatga ega emas”, - degan Ukraina prezidenti.
So‘nngi ma’lumotlarga ko‘ra, zarbalar natijasida 10 kishi halok bo‘lgan, 40 dan ortiq inson jarohatlangan, deydi Poltava viloyati ma’muriyati rahbari Dmitriy Lunin. Uning aytishicha, jabrlanganlarning 9 nafari og‘ir ahvolda. Qutqaruv operatsiyasi davom etmoqda, savdo markazidagi yong‘inni o‘chirishga Ukraina favqulodda vaziyatlar davlat xizmatining 115 nafar o‘t o‘chiruvchisi va yigirmata texnikasi jalb etilgan.
Kremenchugdagi savdo markaziga zarba uzoq masofaga uchuvchi Tu-22 M3 bombardimonchi samolyotlaridan X-22 raketalari bilan amalga oshirilgan, raketalar Kursk viloyatida uchirilgan, deya xabar berdi Ukraina Harbiy havo kuchlari qo‘mondonligi. Rossiya Federatsiyasi Mudofaa vazirligi Kremenchugga raketa hujumi uyushtirilgani haqidagi ma’lumotga hozircha izoh bermadi.
Izoh (0)