Moldova sobiq prezidenti Igor Dodon 27-iyun kuni, uyushgan jinoiy guruh manfaatlari yo‘lida mansab vakolatini suiiste’mol qilganlikda ayblandi, deya xabar berdi “Interfaks”ga respublika Bosh prokuraturasi matbuot xizmatiga tayanib.
Xabarda aytilishicha, ayblov uning 2008-2009-yillarda bosh vazir o‘rinbosari, Iqtisodiyot va savdo vaziri lavozimlarida qilgan harakatlari bilan bog‘liq. Qayd etilishicha, Dodon tomonidan imzolangan xulosa asosida Energocom davlat kompaniyasi Moldovaga mamlakat uchun noqulay shartlarda elektr energiyasi yetkazib berish bo‘yicha shartnoma imzolagan.
“Ushbu harakatlar natijasida davlatga 11,9 million AQSH dollari miqdorida zarar yetkazilgan, keyinchalik ular ayrim ofshor kompaniyalarning hisob raqamlariga o‘tkazilgan. Shu bilan birga, bu harakatlar elektr energiyasi tariflarining oshishiga olib kelgan, bu esa yakuniy iste’molchilar —Moldova fuqarolarning huquqlariga ta’sir qilgan”, deyiladi prokuratura bayonotida.
Qayd etilishicha, sobiq prezident ushbu ayblovni tan olmagan.
Moldovaning sobiq prezidenti Dodon 24-maydan beri uy qamog‘ida. U uyi, idoralari, ota-onasining uyi va boshqa binolarida uzoq davom etgan tintuvlardan so‘ng hibsga olingan. Sobiq prezident Jinoyat kodeksining to‘rt moddasi bo‘yicha ayblangan: passiv korrupsiya, siyosiy partiya tomonidan jinoiy tashkilotdan mablag‘ olish, noqonuniy boyib ketish va davlatga xiyonat.
Dodon va uning partiyasi unga nisbatan qo‘zg‘atilgan jinoiy ishni prezident Mayya Sandu tomonidan siyosiy repressiya va muxolifatga bosim o‘tkazish sifatida baholamoqda.
Izoh (0)