Yuriy Shatunovning o‘limidan keyin jinoyat ishi qo‘zg‘atilgani haqidagi xabarlar rad etildi

“Laskoviy may” guruhi sobiq yakkaxoni Yuriy Shatunovning vafoti munosabati bilan jinoyat ishi qo‘zg‘atilgani to‘g‘risidagi ma’lumot haqiqatga to‘g‘ri kelmaydi, deya xabar berdi Rossiya Tergov qo‘mitasining Moskva viloyati bo‘yicha boshqarmasi.

Qo‘shiqchiga o‘z vaqtida yordam ko‘rsatmagan tez yordam shifokorlariga qarshi jinoiy ish qo‘zg‘atilgani haqida Shatunovning direktori Arkadiy Kudryashov “Komsomolskaya Pravda” nashriga ma’lum qilgan edi. “Bizga tez yordam brigadasi yuborildi, u uskunalarga ega bo‘lmagan qadimiy ‘Gazel’ edi. Yurani kasalxonagacha yetkazib bora olmadik, u yo‘lda vafot etdi. Kasalxonada uni jonlantirishga urinishdi, ammo bo‘lmadi”, — dedi Kudryashov.

“RBK” nashriga bergan intervyusida esa Shatunovning direktori tez yordam shifokorlariga nisbatan noroziligi yo‘qligini, chunki ular tomonidan “qo‘pol qonun buzilishlari” bo‘lmaganini aytgandi.

Keyinroq Kudryashov “RBK”ga shifokorlarga nisbatan jinoiy ish qo‘zg‘atilgani haqida unda ma’lumot bo‘lmaganini aytdi. “Shunday masala ko‘tarildi: ‘shifokorlarga noroziligingiz bormi?’ Men, noroziligim yo‘q dedim. Qolgan hammasi, xayp”, — deya qo‘shib qo‘ydi Kudryashov.

Shatunov 23-iyunga o‘tar kechasi vafot etdi. Podmoskovyedagi Rastunovo qishlog‘ida do‘stlari bilan hordiq chiqarayotgan paytda uning mazasi qochgan. U yurak xuruji bilan kasalxonaga og‘ir ahvolda yetkazilgan. Domodedovo markaziy shahar kasalxonasi bosh shifokori Andrey Osipov qo‘shiqchiga tez yordam shifokorlari shoshilinch yordam ko‘rsatishni boshlaganini, ammo Domodedovo kasalxonasi qon-tomir markaziga u klinik o‘lim holatida kelib tushganini aytdi. Uning so‘zlariga ko‘ra, bir yarim soat davomida bir nechta reanimatolog-kardiologlar va nevrologlar musiqachining hayoti uchun kurashgan.

Qo‘shiqchi bilan vidolashuv marosimi 26-iyun kuni bo‘lib o‘tdi. Dafn marosimi 28-iyunga belgilangan. Shatunovning vakiliga ko‘ra, qo‘shiqchi krematsiya qilinadi, xokining bir qismi esa u uzoq yillar yashagan Germaniyada dafn qilinadi.