O‘zbekistonda 2022-yil 1-yanvardan xarid cheklarini “Soliq” mobil dasturi orqali ro‘yxatdan o‘tkazgan jismoniy shaxslar xarid summasidan 1 foiz keshbekka ega bo‘lmoqda. Davlat soliq qo‘mitasining ma’lum qilishicha, may oyi uchun 509 781 nafar iste’molchiga to‘langan keshbek 53,8 milliard so‘mga yetgan.
Qayd etilishicha, kamchiliklar bartaraf etilishi natijasida yanvar—aprel oylari uchun yana 1,8 milliard so‘m keshbek tasdiqlangan.
Yil boshidan buyon 673 597 nafar fuqaroga 180,5 milliard so‘m keshbek to‘lab berilgan.
Fuqarolar tasdiqlangan keshbek summasini bugun, 27-iyundan boshlab bank plastik kartalariga o‘tkazib olishi mumkin.
Avvalroq aprel oyida iste’molchilar tomonidan 61,4 milliard so‘m keshbek yig‘ilgani va shundan 42,3 milliard so‘mi to‘lab berilgani haqida xabar berilgandi.
Xarid chekini skanerlagan fuqarolarga keshbek qaytarish amaliyoti 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekini QR-kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi. DSQ ma’lumotiga ko‘ra, endilikda chekda MXIK kodi to‘g‘ri ko‘rsatilgan barcha tovarlar (xizmatlar) uchun keshbek taqdim etiladi. Rad etish to‘liq xarid summasiga (butun chek uchun) emas, balki faqat ma’lumotlar bazasida mavjud bo‘lmagan MXIK kodi ko‘rsatilgan mahsulot (tovar va xizmat)larga nisbatan qo‘llaniladi.
Izoh (0)