O‘zbekistonda 2022-yil 1-yanvardan xarid cheklarini “Soliq” mobil dasturi orqali ro‘yxatdan o‘tkazgan jismoniy shaxslar xarid summasidan 1 foiz keshbekka ega bo‘lmoqda. Davlat soliq qo‘mitasining ma’lum qilishicha, aprel oyi uchun iste’molchilarga to‘langan keshbek 42,3 milliard so‘mga yetgan.
Qayd etilishicha, 31-may kuni aprel oyi uchun iste’molchilarga yana 3,7 milliard so‘m keshbek to‘lab berilgan. Bu orqali iste’molchilarga yil boshidan buyon 115,9 milliard so‘m keshbek to‘langan.
Shuningdek, shu kuni:
- yanvar oyi uchun 194,4 million so‘m;
- fevral oyi uchun 234,1 million so‘m;
- mart oyi uchun 588,4 million so‘m keshbek to‘landi.
Yil boshidan to‘langan jami summa 115,9 milliard so‘mga yetgan.
Tadbirkorlik subyektlari tomonidan:
- soliq hisobotlari topshirilishi;
- hisobotlardagi kamchiliklar tuzatilishi;
- soliq qarzdorligi kamaytirilishi inobatga olinib, qolgan keshbek summalari avtomatik tarzda to‘lab boriladi.
Avvalroq aprel oyida iste’molchilar tomonidan 61,4 milliard so‘m keshbek yig‘ilgani va shundan 38,6 milliard so‘mi to‘lab berilgani haqida
xabar berilganmdi.
Xarid chekini skanerlagan fuqarolarga keshbek qaytarish amaliyoti
2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekini QR-kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
DSQ ma’lumotiga ko‘ra, endilikda chekda MXIK kodi to‘g‘ri ko‘rsatilgan barcha tovarlar (xizmatlar) uchun keshbek taqdim etiladi. Rad etish to‘liq xarid summasiga (butun chek uchun) emas, balki faqat ma’lumotlar bazasida mavjud bo‘lmagan MXIK kodi ko‘rsatilgan mahsulot (tovar va xizmat)larga nisbatan qo‘llaniladi.
