Ўзбекистонда 2022 йил 1 январдан харид чекларини «Солиқ» мобил дастури орқали рўйхатдан ўтказган жисмоний шахслар харид суммасидан 1 фоиз кэшбэкка эга бўлмоқда. Давлат солиқ қўмитасининг маълум қилишича, май ойи учун 509 781 нафар истеъмолчига тўланган кэшбэк 53,8 миллиард сўмга етган.
Қайд этилишича, камчиликлар бартараф этилиши натижасида январь—апрель ойлари учун яна 1,8 миллиард сўм кэшбэк тасдиқланган.
Йил бошидан буён 673 597 нафар фуқарога 180,5 миллиард сўм кэшбэк тўлаб берилган.
Фуқаролар тасдиқланган кэшбэк суммасини бугун, 27 июндан бошлаб банк пластик карталарига ўтказиб олиши мумкин.
Аввалроқ апрель ойида истеъмолчилар томонидан 61,4 миллиард сўм кэшбэк йиғилгани ва шундан 42,3 миллиард сўми тўлаб берилгани ҳақида хабар берилганди.
Харид чекини сканерлаган фуқароларга кэшбэк қайтариш амалиёти 2021 йилнинг октябрь ойида президентнинг назорат-касса техникасидан фойдаланишни такомиллаштиришга доир қарори қабул қилинганди. Ҳужжат билан 2022 йил 1 январдан бошлаб чакана савдо, умумий овқатланиш ва аҳолига маиший хизмат кўрсатиш объектларида харидни амалга оширган ҳамда ушбу харидни солиқ органларининг махсус мобил иловасида харид чекини QR-код ёрдамида сканерлаш орқали рўйхатдан ўтказган жисмоний шахсларга уларнинг банк карталарига ой якуни билан харид суммасининг 1 фоизи республика бюджетидан қайтарилади. ДСҚ маълумотига кўра, эндиликда чекда МХИК коди тўғри кўрсатилган барча товарлар (хизматлар) учун кэшбэк тақдим этилади. Рад этиш тўлиқ харид суммасига (бутун чек учун) эмас, балки фақат маълумотлар базасида мавжуд бўлмаган МХИК коди кўрсатилган маҳсулот (товар ва хизмат)ларга нисбатан қўлланилади.
Изоҳ (0)