БМТ бош котиби Антониу Гутерриш Россия, Украина, Туркия, Евроиттифоқ ва АҚШ билан Украина маҳсулотини Қора денгиз орқали экспорт қилиш, шунингдек, дунё учун «ўта зарур бўлган» Россия дон маҳсулотлари ва ўғитларини ташиш бўйича «қизғин мулоқот» олиб борилаётганини маълум қилди, деб ёзади «РБК».
«Украиналиклар билан ҳам, россияликлар ва туркияликлар билан ҳам, бошқа томондан эса АҚШ ва Евроиттифоқ билан Украина озиқ-овқат маҳсулотларини Қора денгизда хавфсиз ва ишончли экспорт қилишга, шу билан бирга, дунё учун мутлақо зарур бўлган Россия дон маҳсулотлари ва ўғитларини экспорт қилишга кўмаклашиш учун қизғин мулоқотлар бўлди», — деди Гутерриш.
Гутерриш озиқ-овқат инқирозини тартибга солиш учун Россия ва Украинани дон экспортини қайта тиклаш усулини топишга бир неча марта чақирган эди. Бош котиб таянган маълумотларга кўра, Россия ва Украинанинг дунё буғдой экспортидаги умумий улуши тахминан 29 фоизга етарди.
Ўз навбатида Россия президенти Владимир Путин Москва дунё озиқ-овқат инқирозини ҳал қилишда ёрдам беришга тайёрлигини айтиб, санкциялар бекор қилиниши эвазига ўғит ва қишлоқ хўжалик маҳсулотлари экспортини оширишни таклиф қилганди. Путиннинг фикрича, озиқ-овқат бозоридаги жорий вазият Ғарб мамлакатларининг «хато иқтисодий ва молиявий сиёсати» ва уларнинг Россияга қарши санкциялари келтириб чиқарган.
Россия махсус операцияси фонида экспорт учун йўналтирилган дон ортилган кемалар Украина портларидан чиқишдан тўхтади. Киев Москвани портларни ёпиб қўйишда айблади ва халқаро ҳамжамиятни вазиятни ҳал қилишда қатнашишга чақирди.
Россия ҳукумати денгиз орқали экспортга тўсқинлик қилмаётганини айтиб, кемалар хавфсиз равишда чқииб кетиши учун Украина томони портларни миналардан тозалаши кераклигини таъкидлади. Москва дунёда озиқ-овқат инқирозининг кучайишини ҳам Ғарб мамлакатлари томонидан Россияга қарши киритилган санкциялар билан боғлади.
Изоҳ (0)