Rossiya yaqin oylar ichida Minskga “Iskandar-M” raketa komplekslarini yetkazib beradi. Bu haqda mamlakat prezidenti Vladimir Putin belaruslik hamkasbi Aleksandr Lukashenko bilan suhbatda ma’lum qilgan.
“Avval kelishib olganimizdek, bu masala kun tartibida turgandi va qaror qabul qilingan. Biz yaqin oylarda Belarusga “Iskandar-M” raketa-taktik komplekslarini taqdim qilamiz, ulardan ham ballistik, ham qanotli raketalar sifatida foydalanish mumkin, ham oddiy qurol, ham yadro quroli tashuvchisiga aylantirish imkoni mavjud”, — degan Rossiya prezidenti.
“Iskandar” — Rossiya operativ-taktik raketalar kompleksi, uni mashinasozlik konstruktor byurosi ishlab chiqqan. Mazkur komplekslar 500 kilometrgacha masofada havodan himoya tizimini yo‘q qilishda, dushman raketasiga qarshi himoya uchun mo‘ljallangan.
Shuningdek, Lukashenko Putindan Belarus ixtiyoridagi Su-25 samomyotlarining yadro jangovar birliklari bilan boyitishni so‘ragan va Putin ularni takomillashtirish ishlarida ko‘mak berishni va’da qilgan.
Rossiya prezidenti Yevropa mamlakatlarida 200 yadro taktik qurollari saqlanayotgani, ulardan foydalanish uchun esa 257 ta samolyot tayyor qilib qo‘yilganini bayon etdi.
“Siz ularga muqobil javob berish imkoniyati bo‘lishi kerakligi haqida gapirdingiz, lekin biz ularga javob qaytarishimiz shart emas. Bunga zarurat yo‘q. Ammo xavfsizlikni ta’minlashimiz zarur va bu boradagi fikringizga qo‘shilaman, ittifoqchi mamlakat, KXShT (ODKB)ga a’zo davlatlar xavfsizligini ta’minlashimiz lozim”, — deya ta’kidlagan Putin.
Lukashenko o‘tgan yili noyabr oyida Rossiyadan bir qator operativ-taktik raketa komplekslarini olmoqchi ekanligi haqida gapirgandi. 2022-yil mayda Belarus davlat rahbari “Iskandar” va C-400 raketa komplekslari sotib olinishini ma’lum qildi.
“Putin bilan bu borada kelishib oldik. Yetarlicha “Iskandar”, C-400 raketa kompleskalarini xarid qildik, armiyamizni qurollantirdik. Ayni vaqtda ixtiyorimizda butunlay boshqacha kuchga ega qo‘shin bor. Qurol-yarog‘lar raqibga juda katta zarar keltira oladi”, — degandi o‘shanda Lukashenko.
Fevral boshida Rossiya mudofaa vazirligi C-400 raketa komplekslari Brest viloyatidagi poligonda ittifoqchi mamlakat kuchini tekshirish yuzasidan mashg‘ulotlarda ishlatilganini xabar qilgan. “O‘zaro ittifoq yechimi - 2022” o‘quv mashg‘ulotlari 10-fevralda boshlangan va o‘n kun davom etgan. NATO Rossiya hamda Belarusning qo‘shma mashg‘ulotlari Ukrainaga qarshi urush uchun tayyorgarlik ekanini taxmin qilgan. Shundan keyin Moskva bir necha bor Ukrainaga hujum qilish rejasi yo‘qligini qayd etgan, ammo yakunda fevral oxirida ikki davlat o‘rtasida urush boshlandi.
Izoh (0)