Ukrainaga Yevroittifoqqa a’zolik nomzodi “taqdim etildi” deyish noto‘g‘ri, bu muvaffaqiyatni qadrsizlantiradi, dedi Ukraina prezidenti Vladimir Zelenskiy o‘z murojaatida. Video uning Telegram-kanalida e’lon qilindi.
“Tasavvur qiling, biz Everestni zabt etyapmiz. Oxiridan oldingi nuqtaga yetdik, atrofga qaramadik, hatto nafasimizni rostlamadik va cho‘qqigacha qolgan yo‘l haqida, so‘nggi 1848 metrni qanday bosib o‘tish haqida gapiryapmiz. Bir lahzada biz o‘z muvaffaqiyatimiz haqida unutdik va uni qadrsizlantirdik. Balki oldin 7 ming metrni yengib o‘tganimizni esga olarmiz?” — deya taklif kiritdi Zelenskiy.
Ukraina prezidenti qo‘shimcha qilishicha, erta tongdan internet, radio va televideniyeda Ukraina Yevroittifoqqa qo‘shilish uchun bajarishi kerak bo‘lgan shartlar muhokama qilinmoqda, ular qiyin bo‘lishi va bir necha yil vaqt olishi aytilmoqda. “Keling, biroz bo‘lsa-da xursand bo‘laylik, ich-ichimizdan, jimgina, lekin o‘zimiz, o‘z davlatimiz uchun xursand bo‘laylik. Keling, bu lahzani his qilib, mazasini totaylik”, — deya da’vat qildi u. Zelenskiy ta’kidlashicha, nomzodlik maqomi Ukrainaga “osmondan tushgani yo‘q”.
23-iyun kuni Yevroparlamentning aksariyat deputatlari Ukraina va Moldovaga tezlikda Yevroittifoq a’zoligiga nomzod maqomi taqdim etilishi haqidagi rezolyutsiyani ko‘pchilik ovoz bilan qabul qildi, 529 parlamentariy yoqlab ovoz berdi, 45 kishi qarshi chiqdi, yana 14 kishi betaraf qoldi. Yevrokengash rahbari Sharl Mishel qaror haqida e’lon qilib, uni “tarixiy” deb atadi.
So‘ng Zelenskiy Ukraina bu qarorni mustaqillikka erishganidan buyon qariyb 30 yil kutganini aytdi. Uning ta’kidlashicha, buning sharofati bilan Yevroittifoq o‘zining kuchaytirilishiga qarab “eng katta qadamni tashladi”.
Rossiya rasmiy shaxslari esa Yevroittifoqning qarori yuzasidan turlicha fikrlar bildirdi. Tashqi ishlar vaziri Sergey Lavrov may oyida Ukrainaning nomzod maqomini olishi istiqboli tufayli “jiddiy shubhalari” haqida gapirgan va tashkilot “aslida o‘zi yuzaga kelgan konstruktiv iqtisodiy platformadan tajovuzkor jangovar o‘yinchiga aylangani”ni aytgan edi. Iyun oxirida esa vazir Yevroittifoq harbiy blok emasligini, shu sababli Rossiya uchun xavf va tahdidlar yo‘qligini ma’lum qildi. Prezident vakili Dmitriy Peskov ham Yevroittifoqning Ukraina bo‘yicha qarori “Yevropaning ichki ishi” ekanini aytdi.
“Yevroittifoq, mohiyatan, MDH makonini faol geosiyosiy o‘zlashtirish va undan Rossiyani ‘tiyib turish’ maqsadida foydalanish yo‘lini davom ettirayotganini tasdiqladi”, — dedi Tashqi ishlar vazirligi vakili Mariya Zaxarova.
Izoh (0)